Сочинение тхынымкIэ Урысые чемпионатэу «Своими словами» зыфиIорэр аублагъ. Iофтхьабзэм изэхэщэнкIэ зишIуагъэ къэзыгъакIохэрэм ащыщ Адыгэ къэралыгъо университетыр.
ШIэныгъэхэмкIэ Урысые академиемрэ УФ-м наукэмрэ апшъэрэ гъэсэныгъэмрэкIэ и Министерствэрэ чемпионатым изэхэщэн кIэщакIо фэхъугъэх.
Я 8 — 11-рэ классхэм ащеджэрэ кIэлэеджакIохэр, искусствэм епхыгъэу гурыт сэнэхьат зэзыгъэгъотырэ студентхэр Iофтхьабзэм хэлэжьэнхэ амал яI. Онлайн шIыкIэм тетэу яшIэныгъэхэр аушэтынхэ фае. УпчIэхэм джэуап тэрэзхэр къязытыжьыхэрэр чемпионатым иаужырэ уцугъо ихьащтых ыкIи хэушъхьафыкIыгъэ сочинение атхыщт. Лъэныкъо 15-м щыщэу анахь апэблагъэр ыкIи ашIогъэшIэгъоныр пэшIорыгъэшъэу кIэлэеджакIохэм къыхахыщт.
Анахь сочинение дэгъу зытхыгъэхэм шIухьафтынхэр аратыщтых ыкIи чемпионатым ипартнер хъугъэ апшъэрэ еджэпIэ 14-мэ ачIэхьанхэмкIэ фэгъэкIотэнхэр яIэщтых.
Урысые чемпионатэу «Своими словами» зыфиIорэр 2022-рэ илъэсым къыщегъэжьагъэу зэхащэ.
Адыгэ къэралыгъо университетым ипресс-къулыкъу.
Сурэтыр: АКъУ.