Урысые криминологическэ Ассоциациеу А.И. Долговам ыцIэ зыхьырэм ишъолъыр къутамэ Адыгеим щагъэпсыгъ.
Шъолъыр къутамэм ипащэу агъэнэфагъэр юридическэ шIэныгъэхэмкIэ докторэу, доцентэу, Адыгэ къэралыгъо университетым правэмкIэ и Институт ихэушъхьафыкIыгъэ кафедрэ ипрофессорэу Бэщыкъо Зарем. Джащ фэдэу шъолъыр къутамэм хэхьагъэх мы кафедрэм икIэлэегъаджэхэр.
— Шъолъыр къутамэм хэтхэм тызэрэугъоинэу тэгъэнафэ, Iофтхьабзэу зэхэтщэщтхэм яплан зэхэдгъэуцощт. Ушэтынхэр, конференциехэр, бзэджэшIагъэхэм апэшIуекIогъэным афэгъэхьыгъэ зигъо Iофыгъохэр зэхэтфыщтых, ащ общественностыр къыхэдгъэлэжьэщт, шIэныгъэхэмкIэ тызэдэгощэщт. Ащ нэмыкIэу хабзэм ыкIи хьыкум къулыкъушIэхэм зэзэгъыныгъэ адэтшIызэ Iоф адэтшIэщт, тиIофшIэн шIуагъэ къытыным тыпылъыщт, — къыIуагъ Бэщыкъо Заремэ.
Урысые криминологическэ Ассоциациеу А.И. Долговам ыцIэ зыхьырэр 1991-рэ илъэсым зэхащагъ. ДжырэкIэ нэбгырэ 1300 фэдиз ащ зэрепхы. Урысые Федерацием исубъекти 5-мэ Ассоциацием икъутамэхэр ащагъэпсыгъэх.
БзэджэшIагъэхэм апэшIуекIогъэным фэгъэхьыгъэ шIэныгъэхэр гъэфедэгъэнхэр, зягъэушъомбгъугъэныр, гъэцэкIэгъэнхэр ары ащ пшъэрылъ шъхьаIэу зыфигъэуцужьыхэрэр.
Адыгэ къэралыгъо университетым ипресс-къулыкъу.