Президент платформэу «Россия – страна возможностей» зыфиIорэм къыдыхэлъытагъэу зэнэкъокъоу «Флагманы образования» зыцIэм пэIудзыгъэ шIыкIэм тетэу нэбгырэ мин 34-рэ хэлэжьагъ. Ахэм ащыщэу нэбгырэ 299-р финалым ихьагъ.
Адыгэ къэралыгъо университетым гуманитар шIэныгъэхэмкIэ ыкIи культурэмкIэ и Институт филологиемкIэ ифакультет ия 4-рэ курс щеджэрэ Любовь Синельниковар ащыщ хъугъэ.
ПэIудзыгъэ шIыкIэм тетэу ныбжьыкIэхэм яшIэныгъэхэр къагъэлъэгъуагъ. Зэнэкъокъум иаужырэ уцугъо шэкIогъум зэхащэщт. Ащ зэхэтхэу ыкIи зырызэу ныбжьыкIэхэм зыщаушэтыщт. Финалым къыдыхэлъытагъэу гъэсэныгъэмкIэ экспертхэр зыхэлэжьэщтхэ Iэнэ хъураехэр, зэдэгущыIэгъухэр ыкIи нэмыкI Iофтхьэбзэ зэфэшъхьафхэр афызэхащэщтых.
ПэIудзыгъэ уцугъом гъэсэныгъэм исистемэ игъэIорышIэкIо нэбгырэ 14195-рэ, кIэлэегъэджэ 57635-рэ ыкIи студент 34385-рэ хэлэжьагъ. Ахэм ащыщэу анахь баллыбэ къизыхыгъэ кIэлэегъэджэ ыкIи гъэIорышIэкIо 2183-рэ, студент 299-рэ финалныкъом пхырыкIыгъэх.
Зэнэкъокъум хэлажьэхэрэм шIэныгъэу яIэхэр къагъэлъэгъон, ахагъэхъон, гъэсэныгъэ программэр зэрагъэшIэн ыкIи Урысые Федерацием гъэсэныгъэм исистемэ IофышIэхэмкIэ ирезерв хэхьанхэ амал яIэщт.
Адыгэ къэралыгъо университетым ипресс-къулыкъу.