ХэушъхьафыкIыгъэ дзэ операцием хэлажьэзэ, лIыхъужъныгъэ зэрихьэзэ фэхыгъэ тичIыпIэгъоу Захар Теремец Адыгэкъалэ мыжъобгъухэр къыщыфызэIуахыгъэх. ДзэкIолIыр зычIэсыгъэ Адыгэкъалэ дэт гурыт еджапIэу N2-р ыкIи зыщыпсэущтыгъэ унэр ары мыжъобгъухэр зыщагъэуцугъэхэр.
ИщыIэныгъэ гъогу
Захар Теремец 2003-рэ илъэсым бэдзэогъум и 23-м Адыгэкъалэ къыщыхъугъ, гурыт еджапIэу N 2-м щеджагъ. КIэлэ ныбжьыкIэ пстэуми афэдэу ащ Iэгуаор къырифэкIыныр, пцэжъыяшэ кIоныр икIэсагъ. ЦIыфышIу дэдэу щытыгъ, IэпыIэгъу зищыкIагъэм блэкIыщтыгъэп, ныбджэгъубэ иIагъ. Хъызмэт IофхэмкIэ янэ дэгъоу дэIэпыIэщтыгъ. 2021-рэ илъэсым къыщегъэжьагъэу 2022-рэ илъэсым, Iоныгъом и 25-м нэс УФ-м и УIэшыгъэ КIуачIэхэм ясатырэ зэзэгъыныгъэкIэ къулыкъур щихьыгъ. ХэушъхьафыкIыгъэ дзэ операциеу Украинэм щыкIорэм идзэ пшъэрылъхэр щигъэцакIэхэзэ, икIыгъэ илъэсым, Iоныгъом и 25-м хэкIодагъ. Уф-м и Президент иунашъокIэ щымыIэжьым ЛIыхъужъныгъэм иорден къыфагъэшъошагъ.
АгъэлъэпIагъ
Мыжъобгъухэм якъызэIухын фэгъэхьыгъэ Iофтхьабзэм цIыфыбэ къекIолIагъ: муниципальнэ образованиеу «Адыгэкъал» зыфиIорэм ипащэу Хьачмамыкъо Азэмат, инароднэ депутатхэм я Совет итхьаматэу ТIэшъу Аскэр, заом ыкIи IофшIэным иветеранхэм якъэлэ Совет итхьаматэу Хъодэ Адам, Адыгэкъалэ, Теуцожь ыкIи Тэхъутэмыкъое районхэм ядзэ комиссарэу Гъонэжьыкъо Рэмэзан, шъолъыр фондэу «Хэгъэгум иухъумакIохэр» зыфиIорэм ипащэ игуадзэу Джарымэ Еленэ, фэхыгъэ лIыхъужъым янэу Евгения ыкIи ышыпхъоу Василисэ, иныбджэгъухэр, кIэлэеджакIохэр, къэлэдэсхэр, къэбар жъугъэм иамалхэм ялIыкIохэр…
Адыгэкъалэ ипащэу Хьачмамыкъо Азэмат къэзэрэугъоигъэхэм шIуфэс къарихыгъ, непэрэ шIэжь Iофтхьабзэм къалэм итарихъ чIыпIэ гъэнэфагъэ зэрэщиубытыщтыр къыхигъэщыгъ.
— Мы гурыт еджапIэм щеджэгъэ Захар Теремец, идзэ пшъэрылъхэр ыгъэцакIэхэзэ лIыхъужъэу фэхыгъэм ишIэжь дгъэпытэным фэшI мыжъобгъу къыфызэIутэхы. ХэушъхьафыкIыгъэ дзэ операцием хэлажьэзэ, лIыхъужъныгъэу, псэемыблэжьныгъэу зэрихьагъэхэм афэшI ащ ЛIыхъужъныгъэм иорден къыфагъэшъошагъ. Захар янэкIэ — къо дэгъугъ, илэгъухэмкIэ — ныбджэгъушIугъ. НыбжьыкIэхэм зафэзгъазэмэ, джы пчэдыжь къэс еджапIэм шъукъызыдахьэкIэ, Захар имыжъобгъу шъулъэгъущт ыкIи шъугу къэкIыжьыщт ащ фэдэ пытагъэ зыхэлъ кIалэр мыщ зэрэщеджагъэр, джы шъо а еджапIэм шъузэрэчIэсым шъурыгушхон шъулъэкIыщт. Къин дэдэ сщыхъоу янэ зыфэсэгъазэ, нымкIэ анахь лъапIэр, илъ-фыгъэ, чIинэнэу хъугъэ. Мамырныгъэ щыIакIэ тиIэным фэшI зи Хэгъэгу къэзыухъумэзэ зыпсэ зытыгъэ лIыхъужъ зэрипIугъэмкIэ «тхьауегъэпсэу» есэIо. ЩыIэныгъэ кIакор зэрифэшъуашэу къыгъэшIагъ. Тэпсэуфэ ишIэжь тыгухэм арылъыщт, — къыIуагъ Хьачмамыкъо Азэмат.
Адыгэкъалэ игурыт еджапIэу N 2-м ипащэу НапцIэкъо Аминэт Захар Теремец иилъэс еджэгъухэр къыIотагъэх.
— ТигухэкI къызэрисIотыкIын гущыIэхэр къэзгъотыхэрэп, — еIо еджапIэм ипащэ. – Илъэс заулэкIэ узэкIэIэбэжьымэ еджапIэм къычIэттIупщыгъэ кIэлэ ныбжьыкIэм джы ыпсэ ыгъэтIылъыгъ. Захар сыдигъокIи еджэнымкIэ гумэкIыгъо иIагъэп, илэгъухэм дэгъоу агурыIощтыгъ. ТикIэлэ пIугъэ и Хэгъэгу фэбанэзэ лIыхъужъэу фэхыгъэ, арышъ, ишIэжь еджапIэм сыдигъуи щыдгъэлъэпIэщт. Сыд фэдэрэ зэо-зэпэуцужьи цIыф чIэнагъэ умышIынэу хъурэп, ау лIыхъужъхэр лIэхэрэп, ахэр егъашIэм тыгухэм къарэнэх!
ГущыIэр лъигъэкIотагъ фондэу «Хэгъэгум иухъумакIохэр» зыфиIорэм иреспубликэ къутамэ ипащэ игуадзэу Джарымэ Еленэ.
— Адыгэкъалэ ипащэ ыкIи иадминистрацие, лIыхъужъым янэ, патриотизмэр, шIэжьыр гъэпытэгъэнхэмкIэ мэхьанэ зиIэ Iофтхьабзэм кIэщакIо фэхъугъэ пстэуми фондым ыцIэкIэ «тхьашъуегъэпсэу» шъосэIо. Мамырныгъэ щыIакIэр къаухъумэзэ зыпсэ зыгъэтIылъыгъэ ныбжьыкIэхэм яшIэжь сыдигъуи тщыгъупшэщтэп, —хигъэунэфыкIыгъ Джарымэ Еленэ.
Дзэ комиссарэу Гъонэжьыкъо Рэмэзан гущыIэ фабэхэмкIэ кIэлэ ныбжьыкIэм ышIыгъэ лъэбэкъум къытегущыIагъ.
— Джыри отделением сырипащэзэ, Захар ыныбжьыкIэ къытефэрэ дзэ къулыкъум ращэжьагъэу къэсэшIэжьы. Ар цIыф рэхьатэу, Iэдэб хэлъэу щытыгъ, а шэнышIухэр хэзылъхьэгъэхэ янэрэ еджапIэу зыщеджагъэм иIофышIэхэмрэ сафэраз. А шэнхэм адакIоу, хэушъхьафыкIыгъэ дзэ операцием зыхэфэм, нэмыкI лъэныкъокIэ дзэкIолI ныбжьыкIэм зыкъыгъэлъэгъуагъ. Пытагъэ, лIыхъужъныгъэ хэлъэу, псэемыблэжьэу и Хэгъэгу зэрэфэлъэкIэу къыгъэгъунагъ. ИшIэжь дгъэлъэпIэщт! — къыIуагъ дзэ комиссарым.
Теремец Евгение нэпсыр зэрелъэкIэхы, игухэкI зэрэгъунэнчъэр къыриIотыкIышъурэп. «ЗысигъэгъэкIотэжьынэу къэкIогъагъэм фэд», еIо ащ. ХэкIодэнкIэ къэнагъэ щымыIэу Захар зыгъэпсэфыгъом щыIагъ.
— ИкIожьыгъо пчэдыжьым чъые IэшIум хэтэу сызышъхьарэхьэм, къэзгъэущышъугъэп, — къеIуатэ ным. — Уахътэу зэкIолIэн фаеми згъэгужъуагъэти, ыгу хэкIыгъ. Сыфэягъэп згъэкIожьынэу, сэкъатныгъэ сиI, адрэ сикIэлэ нахьыжъэу Матвей псым ытхьалэрэр къыхихыжьызэ, ежьыр ытхьэлагъ. Ащ пае ымыгъэзэжьын амал иIагъ, ау ыдагъэп. «Сян, синыбджэгъоу къэзгъэнагъэхэм сэри сафэд, ахэм сафэгумэкIы, тикомандири цIыф дэгъу, сыд пIуагъэми, згъэзэжьыщт», — ыIуи, къыпиупкIыгъ. «КIэпсэжъыем» шIокIыгъэ къодыехэу щэрыоным хэфагъэх. КъызэраIотэжьыгъэмкIэ, зэкIэ иныбджэгъухэр къыхэкIыжьыфэхэ ежьыр пытапIэм Iутыгъ, нэбгырабэмэ апсэ къыгъэнагъ. ЛIыхъужъныгъэу, пытагъэу зэрихьагъэхэм афэшI тын лъапIэр къыфагъэшъошагъ. Ежь илъэс 19 нахь ыныбжьыгъэп, унагъо иIэнэу хъугъэп. Ау ышыпхъу икIалэхэр джы янэшым рыгушхонхэу, щысэтехыпIэ афэхъунэу сыщэгугъы.
Мыжъобгъухэм якъызэIухын
Апэ Захар Теремец зыщеджэгъэ еджапIэм, нэужым зычIэсыгъэ унэм мыжъобгъухэр къащызэIуахыгъэх. Iофтхьабзэм хэлэжьагъэхэр зидзэ пшъэрылъ зыгъэцакIэзэ фэхыгъэ лIыхъужъым зы такъикъэ фэшъыгъуагъэх, къэгъагъэхэр мыжъобгъухэм акIэралъхьагъэх.
IЭШЪЫНЭ Сусан.
Сурэтхэр: Iэшъынэ Аслъан.