Лъэпкъ проектэу «Предпринимательствэ цIыкIур ыкIи гурытыр, унэе предпринимательствэм IэпыIэгъу фэхъугъэныр» зыфиIорэм къыдыхэлъытэгъэ зэнэкъокъоу «Агростартапым» икIэуххэр Адыгеим щызэфахьысыжьыгъэх.
Адыгэ Республикэм и ЛIышъхьэ зэрэхигъэунэфыкIыгъэмкIэ, шIуагъэ къэзытырэ амалэу ар щыт, бизнес-проектыкIэхэу АПК-м щагъэцакIэхэрэм ащ къахегъахъо.
— Мыщ фэдэ зэнэкъокъум тиреспубликэкIэ бэ хэлажьэмэ зышIоигъор. ГъэрекIо сомэ миллион 73-рэ хъурэ грантхэр аратыгъагъэмэ, мыгъэ процент 29,3-рэ ахэм къахэхъуагъ ыкIи сомэ миллион 94,4-рэ хъугъэ. Комиссиер лъэIу тхылъ 52-мэ ахэплъагъ. Нэбгырэ 42-мэ япроектхэр зэнэкъокъум къыщыхахыгъэх, — къыIуагъ Адыгэ Республикэм и ЛIышъхьэ.
IофшIэныр езыгъэжьэгъэкIэ фермерхэм лэжьыгъэхэм, хэтэрыкIхэм, цумпэхэм якъэгъэкIынрэ, былымхэм, пцэжъыехэм яхъунрэ атегъэпсыхьэгъэ мэкъумэщышIэ хъызмэтшIапIэхэр зэрэзэхащэщтхэ е ахэм хэхъоныгъэ зэрарагъэшIыщт грантхэр аратыгъэх.
Зэнэкъокъоу «Агростартапым» ишIуагъэкIэ 2022 – 2023-рэ илъэсхэм предпринимательствэ цIыкIумрэ гурытымрэ афэгъэзэгъэ IофшIэпIэ 85-рэ республикэм къыщызэIуахыгъ. Анахьэу мэхьанэ зиIэр мыщ фэдэ IэпыIэгъум ишIуагъэкIэ IофшIэнмыгъотыныгъэм къызэрэкIичырэр, мэкъумэщ хъызмэтшIапIэхэм зызэраушъомбгъурэр, хэгъэгум икъоу гъомылапхъэхэр къыщыхьыжьыгъэнхэм зэрэфэIорышIэрэр ары.