Урысые Iофтхьабзэу «Гражданский мониторинг» зыфиIорэм игъэцэкIэн Адыгеим щылъагъэкIуатэ. Ащ къыдыхэлъытагъэу АР-м хэгъэгу кIоцI IофхэмкIэ и Министерствэ дэжь щызэхащэгъэ Общественнэ советым хэтхэр Мыекъуапэ и ОВД кощын IофхэмкIэ иотдел иподразделение икъулыкъушIэхэм аIукIагъэх. Общественникхэм ащыщхэу Iофтхьабзэм хэлэжьагъэхэр Николай Киселевыр, Елена Абакумовар, Жадэ Зурет.
ЫпшъэкIэ зигугъу къэтшIыгъэ отделым ипащэу Бэгъ Фатимэ дыряIэгъэ зэдэгущыIэгъум къулыкъум пшъэрылъэу зыфигъэуцужьыхэрэм, джырэ уахътэм ехъулIэу анахьэу ынаIэ зытыригъэтырэ лъэныкъохэм, нэмыкIхэм щытегущыIагъэх.
Урысыем ишъолъырыкIэхэм къарыкIыхэрэр къэралыгъом зэрицIыфхэр къэзыушыхьатырэ тхылъыр (паспортыр) ятыгъэнымкIэ пшъэрылъхэр зэшIохыгъэхэ зэрэхъурэм къэзэрэугъоигъэхэм мэхьанэшхо ратыгъ. Отделым икъулыкъушIэхэм къызэраIуагъэмкIэ, блэкIыгъэ илъэсым щегъэжьагъэу мы IофшIэныр агъэцакIэ, гъэпсынкIэгъэ шIыкIэм тетэу паспортыр ятыжьыгъэным, шъолъырыкIэхэм къарыкIыхэрэм агъэхьазырын фэе тхьапэхэр нахь агъэмэкIэнхэм анаIэ тырагъэты. ТапэкIи мы IофшIэныр лъагъэкIотэщт.
Отделым икъулыкъушIэхэм япшъэрылъхэр зэрагъэцакIэхэрэм советым хэтхэр ыгъэрэзагъэх.