Урысые Iофтхьабзэу «ГъогурыкIоныр щынэгъончъэным и ЗыкI тхьамаф» зыфиIорэр рагъэжьагъ.
Ащ Адыгеим и Къэралыгъо автоинспекцие дыригъэштагъ ыкIи кIэлэцIыкIухэм гъэсэныгъэ тедзэ зыщызэрагъэгъотырэ Гупчэм мэфэкI шIыкIэм тетэу Iофтхьабзэр къыщызэIуахыгъ. КIэлэцIыкIухэм яфитыныгъэхэр къэухъумэгъэнхэмкIэ Уполномоченнэу Наталья Агеевар, Гупчэм икIэлэегъаджэхэр, Мыекъуапэ игурыт еджапIэу N7-м икIэлэеджэкIо 70-м ехъу Iофтхьабзэм къырагъэблэгъагъэх.
Пэублэм Адыгеим и Къэралыгъо автоинспекцие зэхэщэн- аналитическэ IофшIэнымкIэ ыкIи пропагандэмкIэ иотдел ипащэу, полицием иподполковникэу Бзэджэжъыкъо Мурат Iофтхьабзэм хэлажьэхэрэм шIуфэс гущыIэхэмкIэ закъыфигъэзагъ.
— ЗэкIэми гъогурыкIоным ишапхъэхэр зэпымыоу зэшъогъашIэх. Джы ахэр чIыпIэу шъузэрыфэрэм елъытыгъэу зэрэжъугъэфедэжьышъущтыр тыуплъэкIущт. Зэнэкъокъоу зэхэтщагъэм иедзыгъохэр зэрэжъугъэцакIэхэрэм къыгъэлъэгъощт шIэныгъэу шъуиIэр зынэсырэр. Iофтхьабзэм икIэухым шIухьафтынхэр къышъожэщтых. КIэлэегъаджэхэм закъыфэзгъазэмэ, шIуагъэ къэзытырэ IофшIэн мыпсынкIэу зешъухьэрэмкIэ «тхьашъуегъэпсэу» къышъосэIо. Тигъогухэр орэщынэгъончъэх! — къыIуагъ Бзэджэжъыкъо Мурат.
Урысые Iофтхьабзэр зэрэрагъэжьагъэмкIэ Наталья Агеевар къафэгушIуагъ. ЗэкIэми шъхьэкIэфэныгъэ гъогум щызэфыряIэным ар къыфэджагъ.
Шъугу къэдгъэкIыжьын, гъогурыкIоныр щынэгъончъэным и ЗыкI тхьамафэ илъэс къэс зэхащэ ыкIи пшъэрылъ шъхьаIэу иIэр кIэлэцIыкIу гъогу-транспорт фыкъоныгъэр нахь макIэ шIыгъэныр ары. ЗыкI тхьамафэм къыдыхэлъытагъэу республикэм ит гъэсэныгъэ учреждениехэм зэкIэми инспекторхэм ЮИД-м иотрядхэр, кIэлэегъаджэхэр яIэпыIэгъухэу гъогурыкIоныр щынэгъончъэным икъулайныгъэхэр къызыщыраIотыкIыщт Iофтхьэбзэ зэфэшъхьафхэр щырагъэкIокIыщтых.
Анахьэу анаIэ зытырагъэтыщтхэм ащыщ телефонхэм, тхьакIумэ Iулъхьэхэм, нэмыкI гаджетхэм язэрарэу къакIорэр. Гъогу зэпырыкIыпIэхэм сакъыныгъэ къызщахагъэфэным, хэушъхьафыкIыгъэ чIыпIэхэм гъогур ащызэпачыным, нэфынэр къэзытырэ пкъыгъохэр, ныбалъэхэр агъэфедэнхэм тхьамэфэ реным къыфэджэщтых.
Урысые Iофтхьабзэу «ГъогурыкIоныр щынэгъончъэным и ЗыкI тхьамаф» зыфиIорэр Адыгеим зэрэщыкIуагъэм фэгъэхьыгъэ тхыгъэхэр тигъэзет къыхиутыщтых.
Iэшъынэ Сусан.
Сурэтхэр Iэшъынэ Аслъан тырихыгъ.