Росгвардием и ГъэIорышIапIэу Адыгэ Республикэм щыIэм пшъэрылъ гъэнэфагъэ зыгъэцэкIэрэ иотрядэу «Фыщт» зыфиIорэм иIофышIэхэмрэ къалэу Мыекъуапэ игурыт еджапIэу N 10-м чIэс кIэлэеджакIохэмрэ зэгъусэхэу зэхащэгъэгъэ Iофтхьабзэр зыфэгъэхьыгъагъэр полицием ипрапорщикэу, Урысые Федерацием и ЛIыхъужъэу Артем Гармаш ары. Нафэу зэрэщытымкIэ, икъулыкъу пшъэрылъхэр ыгъэцакIэхэзэ 2012-рэ илъэсым ар фэхыгъ.
ЛIыхъужъым янэу Ирина Петровнар ягъусэу кIэлэеджакIохэм, кIэлэегъаджэхэм, Росгвардием иофицерхэм илъэс 11-кIэ узэкIэIэбэжьмэ уIэшыгъэ бзэджашIэхэм апэуцужьызэ фэхыгъэ кIалэм исурэт зэрыт стендым къэгъагъэхэр кIэлъыралъхьагъэх.
ЯчIыпIэгъу цIэрыIом фэгъэхьыгъэ турнирэу кIэлэцIыкIухэм зэхащагъэм къыдыхэлъытэгъэ программэм къыхиубытэщтыгъэх кIапсэр зэпэкъудыигъэныр, гранатэр дзыгъэныр, турникым зыщакъудыиныр ыкIи нэмыкIхэр. ХэушъхьафыкIыгъэу анаIэ зытырагъэтыгъэр IэпыIэгъу псынкIэр ятыгъэным тегъэпсыхьэгъэ Iофтхьабзэхэр ары. КъауIэгъэ ныбджэгъур нэмыкI чIыпIэ ахьыжьын фаеу зыщыхъурэм зэрэзекIощтхэр ыкIи нэмыкIхэр къагъэлъэгъуагъэх. ХэушъхьафыкIыгъэ подразделением иIофышIэхэм кIэлэеджакIохэм агу къагъэкIыжьыгъэх чIыпIэ зэжъу ифэхэмэ щынэгъончъагъэм ишэпхъэ шъхьаIэхэу къыдалъытэн фаехэр.
Мы зэнэкъокъум щатекIуагъэр командэу «Вихрь» зыфиIорэр, я 9-рэ «А» классым исхэр ары. ЛIыхъужъым янэ текIуагъэхэм якапитан кубокыр ритыжьыгъ.
Шъугу къэтэгъэкIыжьы: ОМОН-м иснайперэу, полицием ипрапорщикэу Артем Гармаш Республикэу Дагъыстан и Цунтинскэ район хэхьэрэ псэупIэу Хутрах хэушъхьафыкIыгъэ дзэ операциеу 2012-рэ илъэсым Iоныгъом и 15-м щыIагъэм хэкIодагъ. Иныбджэгъухэр къыухъумэхэзэ, ежь машIом зыпэIуидзагъ, уIэгъэ хьылъэхэм арылIыкIыгъ. Икъулыкъу пшъэрылъ ыгъэцакIэзэ лIыхъужъныгъэу зэрихьагъэм пае полицием ипрапорщикэу Артем Гармаш идунай зехъожь нэуж Урысые Федерацием и ЛIыхъужъ цIэ лъапIэ къыфагъэшъошагъ.