Я VI-рэ шъолъыр кIэлэцIыкIу театральнэ фестивалыр Iоныгъом и 19-м къыщегъэжьагъэу и 21-м нэс Мыекъуапэ щэкIо. Адыгэ Республикэм культурэмкIэ и Министерствэрэ АР-м иконцертнэ объединениерэ ащ кIэщакIо фэхъугъэх. Урысыем и Къыблэ ыкIи и Темыр-Кавказ федеральнэ шъолъырхэм ащызэлъашIэрэ кIэлэцIыкIу театральнэ купхэр зэхахьэм къекIолIагъэх.
Нысхъэпэ театрэм ихудожественнэ пащэу, АР-м инароднэ артистэу Сихъу Станислав гущыIэ фабэхэмкIэ Iофтхьабзэр къызэIуихыгъ. «Театральное зазеркалье» зыфиIорэ фестивалым къекIолIагъэхэм шIуфэс шъотэхы», — къыIуагъ С. Сихъум.
АР-м культурэмкIэ и Министерствэ иотдел ипащэу, АР-м культурэмкIэ изаслуженнэ IофышIэу Шэуджэн Бэлэ фестивалым къекIолIагъэхэм закъыфигъэзагъ.
«АР-м культурэмкIэ и Министерствэ ыцIэкIэ я VI-рэ шъолъыр кIэлэцIыкIу театральнэ фестивалым къекIолIагъэхэм сэлам шъосэхы. Шъолъыр зэфэшъхьафхэм къарыкIыгъэ пшысэIуатэхэм якъэгъэлъэгъонхэм шъуяплъынэу амал шъуиI», —къыIуагъ Шэуджэн Бэлэ.
Фестивалэу «Театральное зазеркалье» зыфиIорэм къыдыхэлъытагъэу Адыгеим щыпсэухэрэр ыкIи ихьакIэхэр пшысэхэм, мюзикл хьалэмэтхэм яплъыгъэх.
Фестивалым иапэрэ мафэ М. Садовниковым ипьесэ техыгъэ спектаклэу «Али Баба» зыфиIорэмкIэ къызэIуахыгъ. Ижъ-ижъыжькIэ, лIэшIэгъубэкIэ узэкIэIэбэжьымэ къокIыпIэм щыхъугъэ къэбар гъэшIэгъоным спектаклыр къытегущыIэ. ЦIыфэу зыгу къабзэм иIоф зэрыкIэкIыщтым, игухэлъхэр къызэрэдэхъущтым щэч зэрэхэмылъыр ащ къыушыхьатыгъ.
ШIугъэр зепхьэу упсэун зэрэфаер ащ еплъыгъэ кIэлэцIыкIухэм къагурыIуагъ.
Ащ ыуж Ермэлхьаблэ драмэмрэ комедиемрэкIэ итеатрэ музыкальнэ пшысэу «Синдбаб- мореход» зыфиIорэр къыгъэлъэгъуагъ. Синдбаб зыхэфэгъэ хугъэ-шIэгъэ гъэшIэгъонхэм цIыф зыщымыпсэурэ чIыпIэм къинэу щилъэгъугъэм, ащ ичаныгъэрэ ишIулъэгъу къабзэрэ яшIуагъэкIэ псаоу къызэрэнэжьыгъэм фэгъэхьыгъэ пшысэ хьалэмэтым кIэлэцIыкIухэр еплъыгъэх, ащ гухахъо хагъотагъ.
Iоныгъом и 20-м кIэлэцIыкIухэр «Аленький цветочек» зыфиIорэм еплъыгъэх. «АР-м и Театральнэ объединениерэ» Урыс Къэралыгъо драматическэ театрэу А.С.Пушкиным ыцIэ зыхьырэмрэ пшысэр къагъэлъэгъуагъ. Ащ дэлэжьагъ Адыгэ Республикэм изаслуженнэ артистэу Ацумыжъ Адам.
СатыушIым ипшъэшъэ нахьыкIэу Настенькэ шIухьафтынэу зыкIэлъэIугъэ къэгъэгъэ хьалэмэтым лъыхъузэ цIыф нэджэ-Iуджэм зэрыIукIагъэр актерхэм къыраIотыкIыгъ. Нэджэ-Iуджэр пщы кIэлэ дахэу къызэрычIэкIыгъэм кIэлэцIыкIухэр ыгъэгушIуагъэх, шIулъэгъуныгъэ дахэм фэгъэхьыгъэ пшысэр лъэшэу агу рихьыгъ.
Ащ ыуж Ингушетием и Къэралыгъо ныбжьыкIэ театрэ испектаклэу «Крысиный бунт» зыфиIорэм кIэлэцIыкIухэр еплъыгъэх. Режиссерэу Лейла Хадзиевам къэгъэлъэгъоныр шэпхъакIэм илъэу ыгъэуцугъ.
Фестивалым иящэнэрэ мафэ къэгъэлъэгъон гъэшIэгъонхэр щыIагъэх. Спектаклэу «Смартфон для Бабы-яги» зыфиIорэр АР-м и Лъэпкъ театрэу Цэй Ибрахьимэ ыцIэкIэ щытымрэ
АР-м иконцерт объединениерэ агъэуцугъ. Пшъэшъэжъыеу Дианэ исмартфонэу шIокIодыгъэм лъыхъузэ тыгъужъи, чэтыу шIуцIэри ыкIи НэгъучIыцэри ыпэ къифагъэх. Дианэ зыIукIэгъэхэ нэуж ахэм нахь гукIэгъу ахэлъ хъугъэ. Пшысэм зекIокIэ тэрэзым уфегъасэ.
Къэгъэлъэгъон гъэшIэгъонэу «Отважные капитаны» зыфиIорэмкIэ фестивалыр зэфашIыжьыгъ. Пшысэм ныбджэгъуныгъэм уфегъасэ. Режиссер цIэрыIоу, Урысыем искусствэхэмкIэ изаслуженнэ IофышIэу Сулейман Юныс ар ыгъэуцугъ.
Мэфищым кIогъэ фестивалым къыщагъэлъэгъогъэ пшысэхэр зым нахьи адрэр нахь гъэшIэгъоныгъ. ШIу пшIэным имэхьанэ, адыгэхэм яшэн-хабзэхэр тиартистхэм къыраIотыкIыгъэх. Адыгэмэ зэраIоу, шIу зышIэрэр шIум IокIэжьы. Спектаклэхэм кIэлэцIыкIухэр, ны-тыхэр яплъыгъэх, цIыфхэм язэфыщытыкIэхэмрэ пшысэмрэ зэрагъапшэхэзэ зэфэхьысыжьхэр ашIыгъэх.
Лъэпшъыкъо Фатим.
Сурэтхэр: А. Лаутеншлегер.