Щытхъу хэлъэу, гъэхъэгъэшIухэр ышIыхэзэ илъэс пчъагъэрэ Iоф зэришIагъэм фэшI Мыекъопэ троллейбуснэ гъэIорышIапIэм иводителэу ШэхэлI Мухьдинэ УФ-м и Президент и Щытхъу тхылъ къыфагъэшъошагъ.
ИцIыкIугъом къыщегъэжьагъэу зыфэщэгъэ сэнэхьатым Аскъэ-лае щыщ хъулъфыгъэм ищыIэны-гъэ гъогу рипхыгъ. Апэрэ мафэм къыщыублагъэу анахь чанэу Iоф зышIэхэрэм ясатырэ хэтэу къы-хьыгъ. Непэ МыекъуапэкIэ анахь водитель IэпэIасэхэм ар ащыщ.
— СыцIыкIоу сятэ джэгуалъэу троллейбус къысфихьыгъагъ, ар лъэшэу сыгу рихьыщтыгъ. «Троллейбусым водителэу сисыщт» сыдигъокIи сIощтыгъ. Гурыт еджапIэр къызысэухым дзэм къулыкъу щысхьыгъ, къызысэгъэзэжьым сызыкIэ- хъопсыщтыгъэ сэнэхьатыр зэз-гъэгъотыгъ. Советскэ лъэхъа-ным троллейбусым водителэу уисыным осэ ин иIагъ, анахь IофшIэн дэгъухэм ащыщэу алъытэщтыгъ, сомэ 250-м силэжьапкIэ нэсыщтыгъ, ар ахъщэшхуагъ, — еIо тигущыIэгъу.
ШэхэлI Мухьдинэ илъэс 38-рэ хъугъэ мы сэнэхьатым ищыIэ-ныгъэ гъогу зырипхыгъэр. Илъэс зэкIэлъыкIохэм троллейбус зэ-фэшъхьафхэм арысыгъ. ИIоф-шIэнкIэ пшъэдэкIыжь ин зэриIэр къыгурыIозэ цIыфхэр зэрещэх, ар къашIэжьы, шъхьэкIафэ къыфашIы.
— Илъэс 22-рэ сыныбжьыгъэр IофшIэныр зесэгъажьэм, а уахътэм къыкIоцI бэ зэхъокIыгъэ хъугъэр. ЫпэкIэ троллейбусым зыгорэ къыщышIыгъэми, тэ дгъэцэкIэжьэу къыхэкIыщтыгъ. Джы электрик тиIэу зэкIэ егъэтэрэзыжьы. Гъогум тытетэу троллейбусыр зекIоным пае электрорыкIуапIэхэм апыгъэнэгъэ пкъыгъор зэгъо дэдэрэ къыпызэу мэхъу, тиIофшIэнкIэ джары гумэкIыгъоу анахьыбэмкIэ къыхафэрэр. ЦIыфхэр зезыщэрэ общественнэ транспортыкIэ Мыекъуапэ игъогухэм бэу атет хъугъэми, троллейбусыр чIэнагъэ ашIыгъэу къысфэIощтэп, макIэп къитIысхьэрэр, анахьэу пчэдыжьым ыкIи пчыхьэм. Сэкъатныгъэ зиIэхэм афытегъэпсыхьагъэх джы титроллейбусхэр, курэжъыем исхэр къитIысхьэу бэрэ къыхэкIы, — еIо ащ.
Троллейбусым иводителэу Iоф пшIэныр къызэрыкIоу щы-тэп. Зы такъикъ лые ымыгъакIоу гъогум техьан фае. Ом изытет емылъытыгъэу IофшIэныр зэри-фэшъуашэу егъэцакIэ. Пчэды-жьым сыхьатыр 7-м къыщегъэ-жьагъэу пчыхьэм сыхьатыр 7-м нэс Iоф ешIэ.
— Троллейбусыр зепфэным къиныгъо зи хэлъэп, уесэжьы, ау щэIэгъэшхо пхэлъын фае. УиIофшIэн шIу плъэгъоу, уасэ фэпшIы зыхъукIэ, пшIэрэм гухахъо хэогъуатэ. Аужырэ илъэсхэм гъогухэм автомобилэу атетыр нахьыбэ зэрэхъугъэм къиныгъохэр къыздехьых, гъогурыкIоным ишапхъэхэр зыукъохэрэр къахэкIых, цIыфхэр къепщэкIыхэ зыхъукIэ усакъын фае, ахэм ящыIэныгъэ тэ тIэ илъ, — еIо Мухьдинэ.
Мы сэнэхьатымкIэ хъулъ-фыгъэм илъэс 20-рэ, бзылъ-фыгъэм илъэс 15-рэ зэпымыоу Iоф зашIэкIэ, пенсием кIонхэ фитых.
ЦIыфхэм троллейбусыр агу рехьы, нахь щынэгъончъэу алъытэ. Непэ гъогупкIэр сомэ 20-м нэсыгъ, ау студентхэм, сэкъатныгъэ зиIэхэм фэгъэкIотэнхэр яIэх.
Зэрифэшъуашэу иIофшIэн зэригъэцакIэрэр къэзыушы-хьатырэ щытхъу тхылъ пчъагъэ иI, ахэм ащыщ УФ-м транспортымкIэ и Министерствэ къыфигъэшъошагъэр, «100 лет российскому трамваю» зыфиIорэ медалыр иI. Джы УФ-м и Президент и Щытхъу тхылъэу бэмышIэу къыфагъэшъошагъэм ишIуагъэкIэ IофшIэным иветеран хъугъэ.
ШэхэлI Мухьдинэ мы мафэхэм ыныбжь илъэс 61-рэ хъугъэ. ИщыIэныгъэ ызыныкъо нахьыбэр зэрипхыгъэ сэнэхьатым зы мафи рыкIэгъожьыгъэп, игъэхъагъэхэм ахигъахъоу, джыри бэрэ Iоф ышIэнэу фэтэIо.
ДЕЛЭКЪО Анет.
Сурэтыр: А. Балабась.