Адыгэ республикэ клиническэ сымэджэщым джынэс мыхэр зэримыхьылIэгъэ операцие гъэшIэгъон щашIыгъ.
Республикэм исымэджэщ шъхьаIэ къызэрэщаIотагъэмкIэ, мыщ и Диагностическэ гупчэ бзылъфыгъэу зыкъыфэзыгъэзагъэр зыгъэгумэкIыщтыгъэр ыкопкъ чIыпIэ пытэ горэ иIэ зэрэхъугъэр ары. Травматологэу Алексей Щупляк бзылъфыгъэм иуз къызыхэкIын ылъэкIыщтыр зэригъашIэзэ къызэрэчIэкIыгъэмкIэ, илъэс 20-кIэ узэкIэIэбэжьмэ, ащ икопкъыпшъэ («шейка бедра» зыфаIорэр) операцие ашIыгъагъ.
— А лъэхъаным ащ фэдэ операцие зашIыкIэ, хирургхэм хагъэуцощтыгъ Смит-Петерсен игъучI гургъ (стержень). Бзылъфыгъэм щыгъупшэжьыгъагъ илъэс 20 зытешIэжьыгъэ шъобжыр, зыгъэгумэкIыщтыгъэ закъор чIыпIэ пытэу ащ иIэ хъугъэр ары. Рентгеным къызэригъэлъэгъуагъэмкIэ, а гъучI гургъыр къупшъхьэм «къыкIэрыкIи» шъом ычIэгъ «къыщикIухьэу» ыублагъ. Алексей Щупляк бзылъфыгъэр операцие ышIи, а гъучI гургъыр «къыубытыгъ» ыкIи къыхихыжьыгъ, — къыщаIотагъ Адыгэ республикэ клиническэ сымэджэщым.