ЗекIоным епхыгъэ фэIо-фашIэхэр дэгъоу зыщызэхащэрэ, шхыныгъо зэфэшъхьафхэр зыщагъэхьазырырэ, глэмпингхэр, кемпингхэр зыщагъэпсырэ, зыгъэпсэфыпIэ чIыпIэхэм зызщырагъэушъомбгъурэ шъолъырхэм Адыгеири ахэхьэ.
Федеральнэ гупчэр ащкIэ республикэм IэпыIэгъу къыфэхъу.
Урысые Федерацием и Правительствэ Iоныгъом и 14-м зэхэсыгъоу иIагъэм лъэпкъ проектэу «ЗекIонымрэ хьакIэхэм нэгуихыгъэу апэгъокIыгъэнымрэ» зыфиIорэм тетэу джырэ шапхъэхэм адиштэрэ хьакIэщхэм яшIынкIэ ахъщэ IэпыIэгъу тедзэ къафыхэгъэкIыгъэным фэгъэхьыгъэ унашъо щаштагъ. А мылъ-кур шъолъыр 58-мэ проект 433-р 2024-рэ илъэсым ыкIэхэм анэс ащыгъэ-цэкIэгъэным пэIухьащт.
«Шъолъыр 13-мэ апэрэу ащ фэдэ ахъщэ IэпыIэгъу къаIукIэщт. ЗекIохэр нахьыбэу къызэолIэрэ чIыпIэхэм хьакIэщ номер мини 2 фэдиз ащкIэ ащагъэпсын алъэкIыщт. Ахъщэ IэпыIэгъу зэратыщтхэр Архангельскэ, Астраханскэ, Ивановскэ, Новосибирскэ, Омскэ, Орловскэ, Пензенскэ, Самарскэ, Ульяновскэ хэкухэр, Забайкальскэ, Ставрополь крайхэр, Тыва ары. Адыгейри ахэм ахэфагъ», — къыIуагъ Адыгэ Республикэм и ЛIышъхьэу КъумпIыл Мурат.
УФ-м экономикэ хэхъоныгъэмкIэ и Министерствэ къызэритыгъэмкIэ, ахъщэ IэпыIэгъу тедзэмкIэ проект 74-рэ а шъо-лъырхэм ащагъэцэкIэн, хьакIэщ номер мини 2 агъэпсын алъэкIыщт. Шъугу къэтэгъэкIыжьы джырэ шапхъэхэм адиш-тэрэ хьакIэщхэм яшIын тегъэпсыхьэгъэ инвестиционнэ проектхэу 2023 – 2024-рэ илъэсхэм агъэцэкIэн фаеу щытхэмкIэ Урысые Федерацием экономикэ хэхъо-ныгъэмкIэ и Министерствэ изэнэкъокъу Адыгеир зэрэхэлэжьэгъагъэр.
Адыгеим и ЛIышъхьэу КъумпIыл Мурат тапэкIэ къызэриIогъагъэмкIэ, илъэс къэс Адыгеим зызыгъэпсэфынэу къакIорэр нахьыбэ мэхъу, илъэсым къыкIоцI зекIо миллионныкъо тиреспубликэ къехьэ. ХьакIэщхэм яномерхэр пэшIорыгъэшъэу зэраубытыщтхэмкIэ цIыфхэм нахьыбэрэ макъэ къагъэIу хъугъэ, республикэм зыщызыгъэпсэфы зышIоигъохэми ахэхъуагъ.