НыбжьыкIэ инспекторхэм яотрядхэр зызэхащагъэр илъэс 50 зэрэхъурэр мыгъэ хагъэунэфыкIы. Ащ къыдыхэлъытагъэу кIэлэцIыкIухэм гъэсэныгъэ тедзэ зыщызэрагъэгъотырэ Гупчэу Мыекъуапэ дэтым шъолъыр телелъэмыджэу «ЮИД без границ» зыфиIорэр щыкIуагъ.
Адыгэ Республикэм имуниципальнэ образовании 9-мэ къарыкIыгъэ ныбжь зэфэшъхьаф зиIэ инспектор ныбжьыкIэхэр хэлэжьагъэх.
Пэублэм Адыгеим и Къэралыгъо автоинспекцие зэхэщэн-зэхэфын IофшIэнымкIэ ыкIи пропагандэмкIэ иотдел ипащэу, полицием иподполковникэу Бзэджэжъыкъо Мурат Iофтхьабзэм хэлажьэхэрэм шIуфэс гущыIэхэмкIэ закъыфигъэзагъ. ЮИД движением имэфэкIкIэ къафэгушIуагъ, гъогу-транспорт фыкъоныгъэхэр дэгъэзыжьыгъэнхэмкIэ IофшIэнэу зэхащэрэм шIуагъэ къыхьынэу ыкIи творческэ гупшысакIэхэр яIэнхэу къафэлъэIуагъ.
ЛъэсрыкIо ныбжьыкIэхэр щынэгъончъэу гъогум щызекIонхэмкIэ шIэныгъэу арагъэгъотыхэрэм афэгъэхьыгъэ Iофтхьабзэу зэрахьэхэрэр кIэлэеджакIохэм езыгъаджэхэрэр ягъусэхэу къаIотагъ.
Iофтхьабзэм икIэух ныбжьыкIэхэм гухэлъышIоу зыдаIыгъхэр къаIотагъэх. Онлайн-зэIукIэгъум хэлажьэхэрэм зэгъусэу рагъэкIокIыщт социальнэ Iофтхьабзэхэр агъэнэфагъэх, авторскэ проектэу пхыращыщтхэм, видеороликэу тырахыщтхэм атегущыIагъэх. Ахэм япхырыщын Адыгеим иеджапIэхэм охътэ благъэм ащырагъэжьэщт.