Iахьзэхэлъ обществэ шъхьэихыгъэу «Урысыем имэшIоку гъогухэр» зыфиIорэр къушъхьэхэмрэ Iэзэгъупс чIыпIэхэмрэ якIущт гъогукIэм икъыхэхын ыуж ит.
ШэкIогъум зекIохэм ямэшIоку Адыгеим къыдахьэзэ ышIыщт. Чэщищрэ мэфитIурэ ар гъогу тетыщт. МэшIокум игъогу: Ростов-на-Дону – Краснодар — ТIуапсэ – Хьаджэхъу — Краснодар — Ростов-на-Дону.
— Тиреспубликэ ичIыпIэ дахэхэр зэзыгъэлъэгъу зышIоигъо зекIохэм япчъагъэ хэхъо зэпыт. Проектэу «Путешествуй с РЖД» зыфиIорэм тызэрэхэлэжьэщтым фэгъэхьыгъэ зэзэгъыныгъэм тапэкIэ тыкIэтхэгъагъ. «Кавказым иналмэс-налкъут» зыфи-Iорэ мэшIокум имаршрут Адыгейри хагъэхьагъ. РЖД-м ипроектыкIэу «Региональные туристические поезда выходного дня» зыфиIорэм тирес-публикэ хэлажьэ», — къыIуагъ Адыгеим и ЛIышъхьэ.
Зэхагъэуцогъэ программэм диштэу мэфитIум къыкIоцI зекIохэм Адыгеир арагъэлъэгъущт, лъэпкъ хабзэхэм нэIуасэ афашIыщтых, лъэпкъ шхыныгъохэр апагъохыщтых.
ЗекIохэм Лэгъо-Накъэ, Рыфабгъо ипсыкъефэххэр, Кавказ биосфернэ заповедникыр зэрагъэлъэгъун, Хьаджэхъу итIуакIэ, Мыекъопэ пивэшI заводым, Адыгэ Республикэм и Лъэпкъ музей ащыIэнхэ, псыфабэхэр къызыщыкIэчъырэ чIыпIэхэм защагъэпсэфын, адыгэ шхыныгъохэм ахэIэнхэ, мэшIокум исхэу сурэт зытырарагъэхын алъэкIыщт.
Мафэм зекIохэм экскурсиехэр афызэхащэщтых, пчыхьэрэ ыкIи чэщрэ вагон зэтегъэпсыхьагъэм зыщагъэп-сэфыщт. 2023-рэ илъэсым шэкIогъум и 3-м, и 17-м, тыгъэгъазэм и 1-м, и 15-м, 2024-рэ илъэсым мэзаем и 23-м, гъэтхапэм и 8-м мэшIокур зекIонэу ра-хъухьэ. Билетхэр шIэхэу ащэхэу аублэщт.
Адыгэ Республикэм и ЛIышъхьэ зэрэхигъэунэфыкIыгъэмкIэ, проектыкIэр зекIохэм агу рихьыщт. Тхьаумэфэ мафэхэм ахэм дэгъоу загъэпсэфынэу, республикэм ехьылIэгъэ къэбар гъэшIэгъоныбэ къызIэкIагъэхьанэу, Кавказым ис лъэпкъхэр хьакIэхэм нэгуихыгъэу зэрапэгъокIхэрэр зэра-гъэшIэнэу амал яIэщт.