Темыр Кавказым щыпсэурэ цIыф лъэпкъхэм язэкъошныгъэ гъэпытэ-гъэным фытегъэпсыхьагъэу Iоныгъом и 5-м къыщегъэжьагъэу и 16-м нэс кушъхьэфэчъэ спортымкIэ зэнэкъокъу рагъэкIокIы. Ар зыщыкIощт шъолъырхэм Адыгэ Республикэри ащыщ.
Мы Iофтхьабзэр 1993-рэ илъэсым къыщегъэжьагъэу зэхащэ. Ар зигукъэкIыр Адыгэ Республикэм иапэрэ Президентэу Джарымэ Аслъан. 1994-рэ илъэсым щыублагъэу Урысыем изэIухыгъэ чемпионат къыдыхэлъы-тагъэу рагъэкIокIы.
Мэфэ пчъагъэм телъытэгъэ зэнэкъо-къур Чэчэн Республикэм икъэлэ шъхьаIэу Грознэм щырагъэжьагъ, аужырэ едзыгъор Iоныгъом и 16-м Адыгэ Республикэм щызэхащэщт.
Урысыем, Белоруссием яспортсмен анахь лъэшхэм зэкIэмкIи километрэ 1127-рэ хъурэ гогууанэр къакIущт.
Зэнэкъокъум иаужырэ я 10-рэ уцугъоу Адыгеим щыкIощтым спорт-сменхэм километри 124,8-рэ къыща-чъыщт. Iофтхьабзэр Iоныгъом и 16-м щыIэщт, къызыщырагъэжьэщтыр къутырэу Казенно-Кужорскэр ары, зыщаухыщтыр — Мыекъуапэ.
— Темыр-Кавказ федеральнэ шъолъырымрэ Адыгеимрэ кушъхьэ-фэчъэ спортым ягупчэхэу зэрэщытхэр мы зэнэкъокъум джыри зэ къеушыхьаты. Мы чIыпIэхэм апхырыкIырэ гъогухэм язытет шэпхъэшIухэм адештэ, чIыопсыр дэхэ дэд. Зэнэкъокъур мэфэкI шъыпкъэ зэрэхъущтым, мы спорт лъэпкъым хэхъоныгъэхэр ышIынхэм зэрэфэ-IорышIэщтым сицыхьэ телъ, — къыIуагъ Урысыем кушъхьэфэчъэ спортымкIэ и Федерацие ипрезидентэу Вячеслав Екимовым.
Джащ фэдэу зэнэкъокъум еплъынэу къекIуалIэхэрэм апае зэхэщакIохэм ВМХ-фристайл-шоу зэхащэщт. Къэра-лыгъом ирайдер анахь лъэшхэм къагъэхьазырыгъэ къэгъэлъэгъонхэм къэзэрэугъоихэрэр яплъынхэ алъэкIыщт. Къырагъэблэгъагъэхэм ащыщых мы лъэныкъомкIэ Урысыем и Кубок къыдэзыхыгъэ Никита Исаковыр, ВМХ-фристайлым хэхьэрэ «дерт» зыфи-IорэмкIэ Москва ичемпионэу Алексей Паршиныр, зэнэкъокъу зэфэшъхьафхэм гъогогъу пчъагъэрэ хагъэунэфыкIырэ чIыпIэхэр къащыдэзыхыгъэ Никита Паустьян, Урысыем щызэлъашIэрэ спортсменхэу Роман Галимзяновымрэ Артем Стахановымрэ.
Iоныгъом и 16-м ВМХ-фристайл зыфиIорэ лъэныкъомкIэ Урысыем ичемпионат Мыекъуапэ щызэхащэщт. Ащ ахъщэ шIухьафтын илъ. Джащ фэдэу Iофтхьабзэм къекIолIагъэхэм ащыщхэу анахь чанэу зыкъэзыгъэлъагъохэрэм шIухьафтынхэр афагъэшъошэщтых. ЦIыфхэм мы мэфэкIыр агу къинэжьыным зэхэщакIохэр пылъыщтых.