Лъэтемыт кIэлэцIыкIу хирургиемкIэ ыкIи травматологиемкIэ шIэныгъэ-гъэсэныгъэ еджапIэм иIофшIэн Москва ыкIи Адыгеим щыщ врачхэр, шIэныгъэлэжьхэр хэлэжьэщтых.
Мыекъопэ къэралыгъо технологическэ университетым Iофтхьабзэр щыкIощт. Лъэпкъ медицинэ палатэм ипрезидентэу, профессорэу Леонид Рошаль, Урысыем изаслуженнэ врачхэу Валерий Митиш, Толиб Ахадовыр, Адыгеим псауныгъэр къэухъумэгъэнымкIэ иминистрэу Мэрэтыкъо Рустем, Мыекъопэ къэралыгъо технологическэ университетым иректорэу Къуижъ Саидэ еджапIэм ипрограммнэ комитет хэхьагъэх.
Iофтхьабзэр Iоныгъом и 14 — 15-м апшъэрэ еджапIэм щызэхащэщт. Врач цIэрыIохэм ыкIи шIэныгъэлэжьхэм докладхэр къашIыщтых, лекциехэм къяджэщтых, ащыщхэр онлайн шIыкIэм тетэу къыхэлэжьэщтых. Врачхэр ыкIи мы сэнэхьатыр зэзыгъэгъотырэ ныбжьыкIэхэм яшIэныгъэхэм ахагъэхъощт.
— Лъэтемыт кIэлэцIыкIу хирургиемкIэ ыкIи травматологиемкIэ шIэныгъэ-ушэтыпIэ институтым зэхищэрэ Iофтхьабзэхэм мэхьанэшхо яI. ОпытхэмкIэ зыщызэхъожьырэ площадкэу а еджапIэр щыт, кIэлэцIыкIухэм медицинэ IэпыIэгъу дэгъу ягъэгъотыгъэнымкIэ шIогъэшхо пылъ. Мыщ фэдэ еджапIэхэр Санкт-Петербург, Налщык, Воронеж,
Грознэм, Улан-Удэ, Тюмень, Краснодар, Екатеринбург, Рязань ащызэхащагъэх. Хэлажьэхэрэр илъэс къэс нахьыбэ мэхъу. ЕджапIэм иплощадкэхэм тызэращыщым тегъэгушхо, — къыIуагъ Къуижъ Саидэ.
Аужырэ технологиехэр зэрэбгъэфедэщтхэр еджапIэм къыщаIотэщтых, лучевой диагностикэм, лапароскопие технологиехэм, шъобж зэфэшъхьафхэм ягъэхъужьын фэгъэхьыгъэ шIэныгъэхэр хэлажьэхэрэм зэрагъэгъотыщтых.
Iофтхьабзэм кIэщакIо фэхъугъэх лъэтемыт кIэлэцIыкIу хирургиемкIэ ыкIи травматологиемкIэ научнэ ушэтыпIэ институтыр, АР-м псауныгъэр къэухъумэгъэнымкIэ иминистрэ, Мыекъопэ къэралыгъо технологическэ университетыр, медицинэ сообществэм и Союзэу «Лъэпкъ медицинэ палатэр» зыфиIорэр, заохэм ыкIи ошIэ-дэмышIэ Iофхэм ахэфэгъэ кIэлэцIыкIухэм IэпыIэгъу языгъэгъотырэ Дунэе шIушIэ Фондыр.
Сурэтхэр: шIэныгъэ-ушэтыпIэ институтыр.