Адыгеим икъэзэкъ ныбжьыкIэхэм я Союз илIыкIохэм Мыекъопэ къэзэкъ отделым иатаманэу Александр Даниловыр ягъусэу станицэу Джаджэм дзэм пае хъытыухэр зыщаблэрэм щыIагъэх, мастер-классым яIэпэIэсэныгъэ щаушэтыгъ. КIэщэкIо купэу «ЗэкIэ фронтым пай, зэкIэ ТекIоныгъэм пай» зыфиIорэм ипащэу Нина Гречка ахэр ригъэблэгъагъэх.
ХьакIэхэм къапэгъокIыгъэх къоджэ псэупIэм ипащэу Сергей Ботвинниковыр, Джэджэ районым иатаманхэу Гречкэхэу Виктор ыкIи Владимир, Хэгъэгум иухъумакIохэм апае хъытыухэр зыблэхэу, гуфэбагъэр къызэбэкIырэ IофшIакIохэр.
Бзылъфыгъэ IэпэIасэхэм къаIуатэрэм къэзэкъ ныбжьыкIэхэр едэIухэзэ, кIэпсэжъыехэр егугъухэзэ аблагъэх, хъытыу Iуданэр лъапсэм пхыращыгъ. Зы сыхьат къэIотэгъукIэ мы IофшIэныр пIэ къибгъэхьан ыкIи угу иуубытэн плъэкIыщтэп. Арышъ, джыри тапэкIэ мыщ фэдэ зэIукIэгъухэр зэхащэнхэу рахъухьагъ.
ХэушъхьафыкIыгъэ дзэ операцием хэлажьэхэрэм мыщ фэдэ хъытыухэр афэблэгъэным изэхэщэн чанэу зэрэдэлажьэхэрэмкIэ, IэпыIэгъу зэрафэхъухэрэмкIэ Мыекъопэ къэзэкъ отделым, Джэджэ район къэзэкъ обществэм яатаманхэм ыкIи Адыгеим икъэзэкъ ныбжьыкIэхэм я Союз ящытхъу тхылъхэр гуфакIохэм аратыгъэх.
Я 300-рэ хъытыум иблэн заухым, Iофтхьабзэм хэлэжьэгъэ пстэури щай зэдешъуагъэх.
ТидзэкIолIхэм агу къыдэтщэеным, тызэракъотыр зэхядгъэшIэным непэ мэхьанэшхо иI. Тызэгъусэмэ — ТекIоныгъэр нахь къэтэгъэблагъэ!
Екатерина Загорулько.
Сурэтхэр авторым иех.