БлэкIыгъэ шэмбэтым къалэр загъэпсыгъэр илъэси 166-рэ зэрэхъугъэр Мыекъуапэ хигъэунэфыкIыгъ. Къалэм и Мафэ тефэу Мыекъуапэ щыпсэурэ ыкIи хьакIэу къэкIогъэ нэбгырэ мин 30 фэдиз культурэм, спортым, гъэсэныгъэм ыкIи нэмыкIхэм япхыгъэ Iофтхьэбзэ зэфэшъхьафхэм ахэлэжьагъэх.
Гъомылапхъэхэр зыщащэгъэ ермэлыкъымкIэ мэфэкIыр ублагъэ хъугъэ. Къалэу Мыекъуапэ иурамэу Советскэм игъэкIотыгъэу ар щыкIуагъ. Пхъэшъхьэ- мышъхьэхэм, IэшIэгъэ пкъыгъо гъэшIэгъон цIыкIухэм анэмыкIэу къалэм итворческэ коллективхэм хьакIэхэм концерт къафатыгъ.
Къалэм и Мафэ тефэу «IэпэIасэхэм якъал» зыфиIорэ къэгъэлъэгъоныр урамэу Краснооктябрьскэм щызэхащэгъагъ. IэпэIэсэ нэбгыри 100-м ехъумэ яIэшIагъэхэр мыщ къыщагъэлъэгъуагъэх, зыгу рихьыхэрэм ахэр ащэфын амал яIагъ. Пхъэм, мыжъом, шэкIым, гъучIым ахэшIыкIыгъэ пкъыгъо зэфэшъхьафхэр бэу щыIагъэх. Мы илъэсым «IэпэIасэхэм якъал» зыфиIорэм апэрэу хэлэжьагъ Херсон хэкум къикIыгъэ Оксана Ткачук. Бзылъфыгъэм хьакIэхэм апае бэ къыгъэхьазырыгъэр: нысхъапэхэр, цIыфыр кIочIэ бзаджэхэм ащызыухъумэн зылъэкIыщт пкъыгъо цIыкIухэр, джэгуалъэхэр ыкIи нэмыкIхэр.
— Мыщ фэдэ пкъыгъо цIыкIухэм яшIын бэшIагъэ ыуж сызихьагъэр. Новэ Каховкэ сыщыпсэу зэхъум мыщ фэдэ къэгъэлъэгъонхэр зэхасщэщтыгъэх. СыкIэхъопсы згъэзэжьымэ къалэм икультурэ зыпкъ игъэуцожьыгъэным сыхэлэжьэным. Адыгеим тызэрэригъэблэгъагъэр лъэшэу гуапэ сщыхъугъ. Бэрэскэшхо пэпчъ мыщ фэдэ IофшIагъэхэм ягъэхьазырынкIэ мастер-классхэр культурэм икъэлэ Унэу «Гигантым» щызэхэсэщэх, — къыIуагъ Оксана Ткачук.
Урамэу Краснооктябрьскэм зыщызыушъомбгъугъэ экспозициер зыфэгъэхьыгъагъэр егъэджэкIо-гъэсакIом и Илъэс ары. Гъэсэныгъэм епхыгъэ учреждениехэу муниципалитетым къепхыгъэхэм ягъэхъагъэхэр мыщ къыщагъэлъэгъуагъэх. Къалэм итамыгъэхэм, ащ итарихъ афэгъэхьыгъэу хьакIэхэм бэ къафаIотагъэр, IэшIагъэхэм япхыгъэуи гъэшIэгъонхэм нэIуасэ афашIыгъэх.
ЕгъэджэкIо-гъэсакIом и Илъэс фэгъэхьыгъагъэр гъэхъагъэу ашIыгъэхэм якъэгъэлъэгъон изакъоп. Къалэм игупчэ шъхьаIэ Мыекъуапэ икIэлэегъаджэхэм япарад щырекIокIыгъ. Гъэсэныгъэ зыщарагъэгъотырэ организацие зэфэшъхьафхэм ащылэжьэрэ кIэлэегъэджэ 1000-м ехъу В. И. Лениным ыцIэкIэ щыт гупчэм къекIолIэгъагъ. Къэлэ духовой оркестрэри ахэм ягъусагъ. Къалэу Мыекъуапэ ипащэу Геннадий Митрофановым парадым хэлэжьагъэхэм закъыфигъазэзэ къыIуагъ:
— Гъэсэныгъэм икъэлэ системэ кIэлэегъэджэ мини 2 фэдиз къыхеубытэ. Ахэр зэкIэ Iофым гуетыныгъэ фызиIэ, IэпэIэсэныгъэ ин зыхэлъ цIыфых. КIэлэегъэджэ ныбжьыкIэхэр ахэм къызэрахахъохэрэр лъэшэу тигуапэ. Гъэсэныгъэм икъэлэ учреждениехэм ащылажьэхэу лъытэныгъэ зыфэтшIыхэрэр, тикIэлэцIыкIухэм шIэныгъэ ягъэгъотыгъэным кIуачIэу ыкIи уахътэу апыжъугъэкIуадэрэм пае инэу тызэрэшъуфэразэр джыри зэ къыхэдгъэщынымкIэ мы илъэсыр амал дэгъоу плъытэн плъэкIыщт.
Ащ нэужым къэлэ паркым мэфэкIыр щылъагъэкIотагъ. Мыщи джащ фэдэу къэгъэлъэгъонхэр, мастер-классхэу Мыекъуапэ итарихъ ичэзыу зэфэшъхьафхэм афэгъэхьыгъэхэр щызэхащагъэх.
«Спортым икъалэу Мыекъуапэ» зыфиIорэ гупчэм муниципальнэ спорт еджапIэхэм яIофшIэн къыщагъэлъэгъуагъ: тхэквондомкIэ яIэпэIэсэныгъэ кIэлэеджакIохэм нафэ къашIыгъ, щэбзэ щэрыонымкIэ егъэджэнхэр зэрэзэхащэхэрэм фэгъэхьыгъэу кIэлэегъаджэхэм къаIотагъ. ТеннисымкIэ зэнэкъокъоу зэхащэгъагъэм илъэс 11-м нэс зыныбжь кIэлэцIыкIухэр ыкIи илъэс 17-м шIомыкIыгъэ ныбжьыкIэхэр хэлэжьагъэх.
Пчыхьэм В. И. Лениным ыцIэкIэ щыт гупчэм спорт Iофтхьабзэу щырекIокIыгъэм къалэм иучреждениехэр зэкIэ хэлэжьагъэх.
МэфэкIыр концерт гъэшIэгъонкIэ ухыгъэ хъугъэ. Ащ хэлэжьагъэх республикэм икъэлэ шъхьаIэрэ Адыгеим ичIыпIэ зэфэшъхьафхэмрэ ятворческэ коллективхэр. Купэу «Сарафан Радио» зыфиIорэм икъэгъэлъэгъон мэфэкIыр нахь къыгъэкIэрэкIагъ. Концертым ыуж Мыекъуапэ и Мафэ фэгъэхьыгъэ мэфэкI мэшIоустхъоми къекIолIагъэхэм агу къыIэтыгъ.
Александра Балабась.
Сурэтхэр авторым иех.