Монополием пэшIуекIогъэнымкIэ федеральнэ къулыкъум и ГъэIорышIапIэу АР-м щыIэм Москва хэкум щыпсэурэм тхьаусыхэ тхылъ къыфигъэхьыгъ. Ар зыфэгъэхьыгъэр Адыгеим изы компаниерэ къэралыгъом иинтернет-платформэ инымрэ хабзэу щыIэр аукъуагъэу зэрегуцафэрэр ары.
Тхьаусыхэ тхылъым зэритымкIэ, гум зэреIэзэхэрэ препаратым фэгъэхьыгъэу интернет нэкIубгъохэм рекламэ къырагъахьэ, ау монополием пэшIуекIогъэнымкIэ федеральнэ къулыкъум и ГъэIорышIапIэу АР-м щыIэм къызэрэщаIуагъэмкIэ, ар Iэзэгъу уцмэ ахахьэрэп.
Къулыкъум агу къыгъэкIыжьыгъ, биологическэ гъомылэпхъэ хэгъахъохэм (БАДхэм) ягугъу ашIы хъумэ, ахэр Iэзэгъу уцэу зэрэщымытхэр къыхагъэщызэ ашIын фае. Рекламэр зытыгъэр Адыгэ Республикэм зэрэщыщым къыхэкIэу монополием пэшIуекIорэ къулыкъоу шъолъырым итыр ары Iофыгъор зэхэзыфыщтыр, ар Iоныгъом и 13-м ащ хэплъэнхэу тыраубытагъ.
ШъунаIэ тешъудз: рекламэм фэгъэхьыгъэ хэбзэгъэуцугъэм ия 25-рэ статья ия 11-рэ Iахь къызэрэщиIорэмкIэ, биологическэ гъомылэпхъэ хэгъахъохэр рекламэ ашIыхэ хъумэ, ахэр Iэзэгъу уцэу зэрэщымытхэр къыдаIонхэу е къыдатхынхэу щыт. Рекламэу къатырэм тырагъэкIодэрэ уахътэм е тхыгъэм чIыпIэу ратырэм ипроцентипшI нахь мымакIэу а анаIэ зытырадзэнэу щытым ыубытын фае.