Мэфэ заулэ къэнэжьыгъ гурыт еджапIэхэм япчъэхэр къызэIуахынхэмкIэ. Илъэс еджэгъукIэм фэгъэхьыгъэ аужырэ гъэхьазырынхэр Адыгеим гъэсэныгъэмкIэ иучреждениехэм ащэкIох.
АР-м гъэсэныгъэмрэ шIэныгъэмрэкIэ и Министерствэ къызэритырэмкIэ, мыгъэ игъэкIотыгъэ гъэцэкIэжьынхэр ащыкIуагъэх Шэуджэн районым ит къутырхэу Тихоновым ыкIи Чернышовым ягурыт еджапIэхэм, Мыекъопэ районымкIэ, станицэу Дахъом гъэсэныгъэмкIэ игупчэу N 5-м, Мыекъуапэ игурыт еджапIэхэу N 20-м, N 23-м, N 3-м, лицееу N 8-м.
Федеральнэ ыкIи шъолъыр къэралыгъо программэхэр агъэцакIэхэзэ республикэм игурыт еджапIэхэм хэхъоныгъэхэр ашIых. КIэлэцIыкIухэм ягъэсэныгъэ-пIуныгъэ, ясэнаущыгъэ ахэзыгъэхъощт шIыкIэ-амалышIухэр къызIэкIагъахьэх. ГущыIэм пае, Тэхъутэмыкъое районым гъэсэныгъэмкIэ игъэIорышIапIэ къызэриушыхьатырэмкIэ, 2023 — 2024-рэ илъэсыкIэ еджэгъум мыщ ит еджапIэхэм «Точка роста» зыфиIорэ гъэсэныгъэ гупчи 6 къащызэIуахыщт. Ахэм ащыщ Яблоновскэм дэт я 5-рэ гурыт еджапIэр. Инэм дэт гурыт еджапIэу N 2-м къэбарлъыгъэIэс технологиехэмкIэ IT-клуб илъэсыкIэ еджэгъум къыщызэIуахынэу агъэхьазырыгъ. Мыщ фэдэ апэрэ гупчэр Мыекъуапэ дэт, ятIонэрэр Инэм джы къыдэуцощт.
Ахэм гъэцэкIэжьынхэр ащыкIуагъэх, Iэмэпсымэхэр къащэфыгъэх, псэуалъэхэр ачIагъэуцуагъэх.
Егъэджэн десэхэм анэмыкIэу кIэлэцIыкIухэм япсауныгъэ зыщагъэпытэн алъэкIыщт спортзалхэри агъэкIэжьых. Лъэпкъ проектэу «Гъэсэныгъэм» хэхьэрэ федеральнэ проектэу «Сабый пэпчъ игъэхъагъ» зыфиIорэм диштэу Хьалъэкъое гурыт еджапIэу Хъуадэ Адам ыцIэ зыхьырэм испортзал игъэцэкIэжьын ыкIэм фэкIуагъ. КIэлэеджакIохэм спорт десэхэм ауж зызщызэблахъун, зызщагъэпскIын алъэкIыщт псэуалъэу спортзалым хэтхэр агъэцэкIэжьыгъэх. Ежь спортзалым иджэхашъо зэблахъугъ, аужырэ шэпхъакIэхэм адиштэу зэтырагъэпсыхьагъ.
Зигугъу къэтшIыгъэ станицэу Дахъом дэт гъэсэныгъэм игупчэу N 5-м ипащэу Ольга Гамаюновам къызэрэтиIуагъэмкIэ, игъэкIотыгъэ гъэцэкIэжьынхэр шышъхьэIум и 25-м аухыгъэх. Федеральнэ, шъолъыр ыкIи муниципальнэ мылъку зэхэтэу сомэ миллион 57-рэ ащ пэIуагъэхьагъ. Класс дэпкъхэр, псырыкIуапIэхэр, канализациер зэблахъугъэх, а щынэгъончъэным ишапхъэхэри къыда-лъытагъэх. Ащ нэмыкIэу сомэ миллиони 8-у къафатIупщыгъэмкIэ гупчэм ищыкIэгъэ псэолъакIэхэр — тIысыпIэхэр, еджэпIэ Iанэхэр, тхылъеджапIэм пае Iэмэ-псымакIэхэр къызIэкIагъэхьагъэх, джащ фэдэу спортзалыри агъэцэкIэжьыгъ.
Мы мафэхэм псэолъэшIгъэцэкIэжьын IофшIэнхэр республикэм иеджапIэхэм ащахьынхэу щыт. ЕджэпIэ щагухэр, классхэр агъэкъэбзэжьых, илъэсыкIэ еджэгъум ехъулIэу кIэлэеджакIохэм пчъэхэр къафызэIуахынхэм зыфагъэхьазыры.