Предпринимательствэм хэхъоныгъэхэр ышIынхэм фытегъэпсыхьэгъэ Iофтхьэбзэ гъэшIэгъон «Мой бизнес» зыфиIорэ Гупчэм щырекIокIыгъ. АР-м предпринимательствэм IэпыIэгъу фэхъугъэнымкIэ и Гупчэ ар зэхищагъ. Зиунэе Iоф къызэIузыхы зышIоигъохэм яшIуагъэ арагъэкIынымкIэ, ащкIэ упчIэу къэуцухэрэм Iоф адэшIэгъэнымкIэ амалхэу щыIэхэр зэхафыгъэх.
Iофтхьабзэм испикер шъхьаIэу, психолог цIэрыIоу Александра Чернавских уиIоф къызэIупхынымкIэ анахьэу унаIэ зытебгъэтын фэе лъэныкъохэм къатегущыIагъ, гумэкIыгъохэм ядэгъэзыжьын зэрэзэхэщэгъэн фаем къэзэрэугъоигъэхэр щигъэгъозагъэх. Нэужым мы Iофыгъохэр нахь куоу зэхафыгъэх.
ЛэжьапкIэм итын, IофшIэнымкIэ фитыныгъэхэр мыукъогъэнхэм афытегъэпсыхьэгъэ хэбзэгъэуцугъэхэм ягъэцэкIэн епхыгъэ упчIэхэри къаIэтыгъэх.
Шъхьэихыгъэ зэдэгущыIэгъур шIуагъэ къытэу рекIокIыгъ, ащ хэлэжьагъэхэр зэхэщакIохэм афэрэзагъэх.
Лъэпшъыкъо Фатим.
Сурэтыр: «Бизнес-среда 01-м» ихъарзынэщ.