Россельхознадзорым епхыгъэ ГъэIорышIапIэу «Краснодарская межобластная лаборатория» зыфиIорэм уплъэкIунхэр зызэхещэхэм хэтэрыкIхэм ащыщхэм нитратхэр бэу ахэлъхэу къыхигъэщыгъ.
Ащ ипресс-къулыкъу къызэритыгъэмкIэ, блэкIыгъэ бэдзэогъу мазэм къыщыублагъэу шышъхьэIум и 17-м нэс химическэ ыкIи таксикологическэ ушэтынхэр кIуагъэх. Картофым, чIыплъым, къоным, «листовой салатым», помидорым, къэбжъыем, хъырбыдзым, нэмыкIхэм шапхъэхэм ашIокIэу нитратхэр ахэлъхэу агъэунэфагъ.
Специалистхэм къызэрэхагъэщырэмкIэ, азот зыхэлъ чIыгъэшIухэр бащэу зэраратыхэрэр ары шапхъэхэм адимыштэнхэм ушъхьагъу шъхьаIэ фэхъурэр, ежь хэтэрыкI лъэпкъхэр зыфэдэхэми мэхьанэ иI. «Листовой салатхэмрэ» къэбжъыемрэ анахьыбэу къызхагъотагъэр. Ахэр уцышъо къэзышIэу ахэлъым игъэпсынкIэ азотым мэхьанэ иI. Ары бэу чIыгъэшIухэр аратынхэ фаеуи зыкIэхъурэр. ЛъэпсэрыкI хэтэрыкIэу пасэу къэхъоу ыкIи Iуахыжьыхэрэми бэу къахэкIых, кIасэхэм ар макIэу «зэIуагъакIэ».
Нитратхэр бэу зыхэлъ гъомылапхъэм псауныгъэмкIэ лъэшэу иягъэ къэкIо. Ащ фэдэ хэтэрыкIхэр, пхъэшъхьэ-мышъхьэхэр цIыфым бэрэ ыгъэфедэхэмэ гур, лъынтфэхэр, нервнэ системэр, иммунитетыр зэIегъахьэх, адэбз уз къахэкIыни ылъэкIыщт.
Нитратэу гъомылапхъэхэм ахэлъымэ хъущт шапхъэхэр Таможеннэ союзым къыгъэнэфагъэх.