ШышъхьэIум и 17-м къыщегъэжьагъэу и 21-м нэс УФ-м и Къэралыгъо быракъ фэгъэхьыгъэ фестивалэу «ХэдыкIыгъэ Урысыер» зыфиIорэр Чуваш Республикэм икъалэу Чебоксары щыкIуагъ.
Урысыем ишъолъыр 68-мэ къарыкIыгъэ купхэр фестивалым хэлэжьагъэх. Къэралыгъом ишъолъырхэм зэкIэми ячIытххэр хэдыкIыгъэхэу ащ къырахьылIагъэх. МэфэкI программэм хэхьагъэх творческэ пчыхьэзэхахьэхэр, IэпэIасэхэм яIэшIэгъэ гъэшIэгъонхэм якъэгъэлъэгъон ыкIи ящэн.
ЧIыпIэ зэфэшъхьафхэм къарыкIыгъэ лIыкIохэм зыфэIазэхэр къагъэлъэгъуагъ. МэфэкIым къекIолIагъэхэр IэпэIасэхэм яплъыгъэхэ къодыеп, ежьхэри Iофтхьабзэм хэлэжьагъ.
Адыгеим илIыкIохэм Адыгэ Республикэм ишъолъыр апэрэ хэдыкIыгъэ чIытхым къэгъэлъэгъоным ращэлIагъ. ЧIытхым игъэхьазырын хэлэжьагъэх дышъэидэнымкIэ тиIэпэIасэхэу Сетэ Сафиет, Гумэ Ларисэ, Джарымэкъо Зурет, Битэ Азэ, Мыгу Рузанэ, езыгъэжьэгъэкIэ IэпэIасэу Гумэ Русет. Адыгеим ичIытх къэтэбэ уцышъо чIыпцIэм хэдыкIыгъ, дышъэ ыкIи тыжьын IуданэхэмкIэ ижъырэ зэманым ипкъыгъо хьалэмэтхэу исп унэр, нарт тхыдэжъхэм бэрэ къахэфэрэ мыIэрысэхэр, чIыгу гъэбэжъум инэпэеплъхэр теолъагъох. Мы пкъыгъохэм тиадыгэ чIыгу ибаиныгъэ къаушыхьаты. Кавказым зэрыщыхабзэу быракъым итеплъэ бэ къыIуатэрэр ыкIи бэмэ уарегъэгупшысэ. ТиIэпэIасэмэ яIэшIагъэхэм къэгъэлъэгъоным чIыпIэ гъэнэфагъэ щаубытыгъ, зэкIэми агу рихьыгъ.
Шэуджэн районым икIыгъэ лъэпкъ купэу «Джэныкъор» къэгъэлъэгъоным хэлэжьагъ. Ижъырэ адыгэ пщыналъэм иорэдхэу «Нарт Шэбатныкъо», «Къэбэртаемэ ячэщ теу», «Мэзгуащэ иорэд» зыфиIохэрэр къыщаIуагъэх. Лъэпкъ шъуашэхэмкIэ дизайнер IэпэIасэу Боджэкъо Беллэ орэдыIо купым шъуашэхэр фидыгъ.
«Фестивалым тызэрыхэлэжьагъэр къэзыушыхьатырэ диплом тикуп къыратыгъ. Лъэпкъ зэфэшъхьафхэм тиорэдыжъхэр зэхядгъэхыгъ, къекIолIагъэхэм ахэр лъэшэу ашIогъэшIэгъоныгъ. Адыгэ шъуашэм фэгъэхьыгъэ упчIабэ къытатыгъ, тхыпхъэхэм къарыкIхэрэр къафэтIотагъ. ШыкIэпщынэм ымакъэкIэ тикультурэ ибаиныгъэ, тишэн- хэбзэ дахэхэр агурыдгъэIуагъ. Тикультурэ итарихъ фэгъэхьыгъэ мастер-класс зэхэтщагъ. А къэгъэлъэгъон кIэкIым «Абдзахэмэ яорэд» ыкIи «Нарт Саусэрыкъо иорэд» зыфиIохэрэр» къащытIуагъэх, — къыIуагъ купэу «Джэныкъом» ипащэу Юсып Заур.
Мыщ фэдэ фестивальхэм лъэпкъхэр зэфащэх, цIыфхэр зэрэшIэнхэмкIэ, зэпхыныгъэ яIэнымкIэ амалышIух.
Лъэпшъыкъо Фатим.