Джыдэдэм хъырбыдз-нашэхэм яуахът, тыдэкIи ахэм ящапIэхэр къащызэIуахыгъэх.
Мыхэр илъэсым зэ къэкIых, арышъ, мыкIодыжьхэзэ зэкIэми зыдгъэшхэкIынэу тыфай, хъырбыдз къолэнышхохэр, нэшэ шэгъо дахэхэр зытелъ мэкIайхэм таблэкIышъурэп. Гъэмафэм иублэгъум мыхэр бэдзэршIыпIэхэм атетлъагъохэмэ ящынэгъончъагъэ техъырэхъышэми, джырэ фэдэ уахътэм яягъэ къытэкIыныр тшъхьэ къихьажьырэп.
Федеральнэ хэбзэгъэуцугъэм къызэрэщыдэлъытагъэмкIэ, хъырбыдз-нашэхэм ящапIэхэр Роспотребнадзорым ыуплъэкIунхэм ушъхьагъу фэхъун ылъэкIыщтыр цIыфхэм тхьаусыхэ тхылъэу къатыгъэр ары. Илъэс IофшIэнхэм яплан хэтэу уплъэкIунхэр зэхащэнхэу хэбзэгъэуцугъэм фитыныгъэ къытырэп. Арэу щытми, яягъэ къытэмыкIыным пае шапхъэу дгъэцэкIэн фаехэр мы къулыкъум къыгъэнэфагъэх.
Роспотребнадзорым АР-мкIэ и ГъэIорышIапIэ къызэрэщытаIуагъэмкIэ, хъырбыдзхэмрэ нашэхэмрэ къэзыгъэкIыгъэ хъызмэтшIапIэр, чIыпIэу къызщагъэкIыгъэр зэрытхагъэу, санитар шапхъэхэм зэрадиштэхэрэр къэзыушыхьатырэ тхылъхэр ымыIыгъхэу зыпарэми ахэр ыщэнхэ фитэп. Автомобиль гъогу гъунэхэм ащащэнхэуи хэбзэгъэуцугъэм къафидэрэп. Арышъ, тыдэми ыгу къызщыкIыгъэм щапIэ щызышIыгъэхэм ащ фэдэ тхылъхэр зэраIэкIэмылъхэр нафэ. Ахэм тащымыщафэмэ нахьышIу.
Хъырбыдзым е нашэм игъо хъугъэмэ, иIэшIугъэ зэрэзэбгъэшIэщтыр зэгоуупкIымэ ары. Ау ащ пае зэгоуупкIыгъахэу мэкIаем тесыр къыхэмыхымэ е иIэшIугъэ зэбгъэшIэнэу къыпфащэигъэ бзыгъэр умышхымэ нахьышIу.
Сыда пIомэ шъэжъыеу агъэфедагъэм икъэбзагъэ ущыгъуазэп, бзыгъахэу щылъым бактериехэр хэхьанхэу игъо имыфэзэ пленкэр тыралъхьагъэмэ пшIэрэп.
Хъырбыдзми, нашэми къэпщэфы пшIоигъор дэгъоу къэпплъыхьан фае. Ищыгъэхэм, цIэнтхъыгъэ горэхэм анэмыкI фыкъуагъэ иIэнэу щытэп. Фыкъогъэ чIыпIэм шIэхэу хэшъукIынэу регъажьэ. Ащи уфэсакъын фае.
Адэ сыдэущтэу игъо хъугъэмэ къэпшIэщт? Мы упчIэм иджэуап къыратыжьызэ ГъэIорышIапIэм къызэрэщытаIуагъэмкIэ, хъырбыдзым ишъуампIэ макIэу хэпцIэнтхъукIыщт. Джыри ар пытэу, уецIэнтхъун умылъэкIыгъэмэ, игъо хъугъэп.
Джащ фэдэу куашэу къызхэкIагъэм къызщыпачыгъэ чIыпIэм кIэ цIыкIоу иIэм изытет уеплъын фае. Ар мэфитф-блы ныIэп зэрэпытырэр. Джыри уцышъоу е гъужьынэу ежьагъэмэ, хъырбыдзым игъо зэрэхъугъэр къегъэлъагъо, зыпари иягъэ къыокIыщтэп, ау а кIэ цIыкIур ушIуцIыгъэмэ, кIодынэу ежьагъэшъ, къэпщэфы хъущтэп.
Хъырбыдзыр чIыгум зыщытесыгъэ чIыпIэр шэгъуашъоу е фыжьышъоу къыхэщын фае. Ар имыIэмэ хъущтэп. Фабэрэ тыгъэрэ ищыкIагъэм фэдиз зэригъотыгъэр, идэгъугъэ, иIэшIугъэ ар яшыхьат.
Хъырбыдз ыкIи нэшэ лъэпкъ зэфэшъхьафхэр щыIэх, ары пэпчъ ышъо, иинагъэ, шIыкIэу иIэр нэмыкI. ГущыIэм пае, хъырбыдзхэм янахьыбэр къолэн, зыпари щымыщ хэмытэу, уцышъоуи мэхъу. IукIыхьэ лъэпкъхэр щыIэх, плIэмыеуи къагъэкIы хъугъэ. Нашэхэр нахьыбэрэмкIэ зэшъо-зэщых, ау лэдэххэр иIэм фэдэу, зыкIышъо зэщимыз лъэпкъхэри мэхъух, хъураех е IукIыхьэх…
Специалистхэм къызэраIорэмкIэ, ащ яIэшIугъи, ящынэгъончъагъи зыпарэкIи епхыгъэхэп. ЧIыгум кIэр зыхалъхьэм ыуж зэрэдэзекIуагъэхэр, ом зэхъокIыныгъэу фэхъугъэхэр, температурэу щыIэр ары нахьыбэрэр зэлъытыгъэр.
— Хъырбыдзым е нашэм иягъэ къыомыкIыным, шъуампIэм шIоеу техьагъэр, бактериехэр купкIым хэмыхьанхэм афэшI ар зэгобгъэчъыным ыпэкIэ псы фабэрэ сабынрэкIэ птхьакIын фае. ЗэгоуупкIыгъэм хэфэгъакIэ зиIэ мэ къыхэумэ, ар пшхы хъущтэп, — къытаIуагъ Роспотребнадзорым испециалистхэм.
Хъырбыдз ыкIи нэшэ лъэпкъ зэфэшъхьафэу щыIэр миным ехъу. Ахэм ягъо зыщыхъурэ уахътэр зэфэшъхьаф. Нахьыбэм япIалъэр шышъхьэIу-Iоныгъо мазэхэр ары. Къыблэ шъолъырэу тызэрысым ибэдзэршIыпIэхэм бэдзэогъум жъугъэу ахэр къатехьэх. Сыд фэдэ уахътэм къагъэкIыгъэми, шапхъэхэр къыдэтлъытэзэ къыхэтхыхэмэ, яягъэ къызэрэтэмыкIыщтыр зыщыдгъэгъупшэ хъущтэп.
ХЪУТ Нэфсэт.
Сурэтхэр: зэIухыгъэ къэбарлъыгъэIэс амалхэр.