Адыгэ къужъым и Мафэ Мыекъопэ районым изыгъэпсэфыпIэу, зекIохэм якIэсэ чIыпIэхэм ащыщэу, псыкъечъэхыпIэу Рыфабгъо дэжь илъэс 12 хъугъэу щыхагъэунэфыкIы.
Шъолъыр зэфэшъхьафхэм къарыкIырэ гъэпсэфакIохэр ащ зэфещэх. Адыгэ лъэпкъым ишэн-хабзэхэм, илъэпкъ шхынхэм, итарихъ ыкIи икультурэ нэIуасэ афэхъух.
Рыфабгъо ипсыкъефэхыпIэхэр къызщежьэрэ бгышъхьэм узыдэкIуаекIэ, ижъырэ адыгэ къужъэе чъыгхэр хэтых. Шъоф зэикIым къужъ 20 къыщэкIы. Анахьыжъым илъэс 250-рэ ыныбжьэу мэфэкIым изэхэщакIохэм хагъэунэфыкIы. Къужъым и Мафэ изэхэщэн кIэщакIо фэхъугъэр компаниеу «Руфа-тур» ипащэщтыгъэу, этнотуризмэм тишъолъыр зыщиушъомбгъуным ишъыпкъэу дэлажьэщтыгъэу Бибэ Мурат. Джы ишъхьэгъусэу Нуретрэ ыпхъухэу Заремэрэ Анерэ ятэ ипроект лъагъэкIуатэ.
«Чъыг хьалэмэтхэр къызщыкIыхэрэ чIыпIэхэу Сырыфыбг тетхэм цIыфхэр нэIуасэ афэтэшIых. Адыгэхэр чъыгхатэхэм якъэгъэкIын зэрэпылъыгъэхэр ядгъэшIэным, къэнэгъэ чъыгхэр рамыупкIынхэм, тапылъ. «Къужъыр къызефэхкIэ ылъапсэ ефэжьы» аIо адыгэмэ.
НыбжьыкIэу къыткIэхъухьэхэрэм непэ лъэпкъ тарихъыр ашIэн фае», — хигъэунэфыкIыгъ Гъыщ Заремэ.
МэфэкIыр, зэрэхабзэу, гъэшIэгъонэу зэхэщэгъэщт. Ижъырэ адыгэ къужъхэм яплъынхэу Сырыфыбг зекIо куп дэкIоещт, къужъэу къапытэкъугъэхэр къашыпыщтых. ЗекIо купыр къызехыжькIэ, мэфэкI концерт орэдыIо-къэшъокIо купхэм къафатыщт, къужъым хэшIыкIыгъэ шхыныгъо зэфэшъхьафхэмкIэ хьакIэхэр агъэшIощтых, къужъыпс чъыIэр апагъохыщт.
Лъэпшъыкъо Фатим.