Азием и Кубок

Азием и Дунэе Кубкэу Казахстан ихыкъумэу Тайганколь щы­кIуагъэм Урысыем икуп гъэхъагъэхэр щишIыгъэх. Урысыем ипцэжъыяшэхэм медали 4 къахьыгъ, унэе зачетымкIэ я 2-рэ, я 3-рэ чIыпIэхэр, команднэ зачетымкIэ я 2-рэ, я 3-рэ чIыпIэхэр къахьыгъэх.

Казахстан, Урысыем, Азербай­джан, Киргизием, Узбекистан къа­рыкIыгъэгъэ куп 20 зэнэкъо­къухэм ахэлэжьагъ. ПстэумкIи зэхэлъытагъэу пцэжъыяшэхэм къыхадзыгъэ пцэжъыехэм килограмм 575-м ехъу къащэчыщтыгъ. Казахстан ары команднэ зачетымкIэ атекIуагъэр, ащ ипцэжъыя­шэхэм килограмм 95-м ехъу къаубытыгъ. Тюмень къикIыгъэ спортсменхэм килограммкIэ нахь макI къыхадзыгъэр, ахэм я 2-рэ чIыпIэр афагъэшъошагъ. Оренбург хэкум ипцэжъыяшэхэм я 3-рэ чIыпIэр ахьыгъ, пцэжъые карп килограмм 84-м ехъу къаубытыгъ. Адыгеим ипцэжъыяшэхэри зэнэ­къокъухэм ахэлэжьагъэх, унэе зачетымкIэ ахэм я 8-рэ чIыпIэр къахьыгъ, пцэжъые килограмм 27-м ехъу къыхадзыгъ. Павлодар къикIыгъэ пцэжъыяшэхэм ягъусэу команднэ зачетым я 9-рэ чIыпIэр ахэм къыщахьыгъ.