Нахь Iэрыфэгъущт

Роскадастрэм ихъарзынэщ электроннэ шIыкIэм тырагъахьэ. 2023-рэ илъэсыр къызихьагъэм къыщыублагъэу ащ хэлъ тхылъ мин 27,5-р ащ тетэу агъэпсыжьыгъах. Нэбгырэ 15-мэ ащ Iоф дашIэ.

— Хъарзынэщыр электроннэ шIыкIэм тетэу гъэпсыгъэмэ, тхылъхэр учет нахь шIыгъошIу ыкIи къызэтегъэнэжьыгъошIу хъущт. Ащ имызакъоу, цIыфхэм яфэIо-фашIэхэр нахь гъэцэкIэгъошIу къышIыщтых, — къыIуагъ Роскадастрэм АР-мкIэ и ГъэIорышIапIэ ипащэу ХъокIо Аюбэ.

Электроннэ шIыкIэм тетэу хъарзынэщыр гъэпсыгъэмэ, тхылъэу ащ хэлъхэр кIодыщтхэп, чIэнагъэ хъущтхэп, къэбарэу арытыр нахь псынкIэу къадэпхышъущт, тхьылъыпIэу атекIуадэрэр къызэрэзэтенэщтым имызакъоу, чIыпIэу аубытырэри нахь макIэ хъущт. Непэ Адыгеим и Роскадастрэ ихъарзынэщ квадратнэ метрэ миным ехъу зэлъиIыгъ.

МызекIорэ мылъкоу кадастрэ учетым хэтхэр зиехэм фитыныгъэу яIэхэр къэзыушыхьатырэ тхылъыр ящыкIагъэ зыхъукIэ, ащ техыгъэ копиер къаратыщт. Ащ зыщыкIэлъэIухэрэ тхылъыр МФЦ-м щатын алъэкIыщт, Росреестрэм иинтернет нэкIубгъо е къэралыгъо фэIо-фашIэхэм япортал агъэфедэми хъущт. Шъхьадж зэрищыкIагъэм елъытыгъэу, тхылъыр тхьапэм тетэу е электроннэ шIыкIэу къызIэкIагъэхьан алъэкIыщт, тIуми зэфэдэу кIуачIэ яI, ау электроннэм ыуасэ нахь макI.

МызекIорэ мылъкур республикэм имытымэ, ар зыдэщыIэ шъолъырым и Роскадастрэ ихъарзынэщ хэлъ тхылъым икопие Адыгеим щыIэ ГъэIорышIапIэм иIофышIэхэм электроннэ шIыкIэм тетэу къыхахыщт.

Къэралыгъо программэу «Национальная система пространственных данных» зыфиIорэм къыдыхэлъытагъэу хъарзынэщыр электроннэ шIыкIэм тетэгъэхьажьы. МызекIорэ мылъкум епхыгъэ тхылъхэм якъэгъотыни, анализ шIыгъэнхэри ащ къыгъэпсынкIэщт, кадастрэ учетым, ащ фэдэ мылъкумкIэ фитыныгъэхэм ярегистрацие уахътэу атекIуадэрэр нахь макIэ хъущт, мызекIорэ мылъкум и ЗыкI къэралыгъо реестрэ къыхэхыгъэ тхылъхэр цIыфхэм аIэкIэгъэхьэгъэнхэр нахь IэшIэх къышIыщт, — къы­Iуагъ Росреестрэм АР-мкIэ и ГъэIорышIапIэ ипащэу Марина Никифоровам.