ПсэолъэшIыным зырагъэушъомбгъущт

Адыгэ Республикэм и Правительст­вэ и Унэ компаниеу «ДОМ.РФ» зы­фиIорэм илIыкIохэм щадыряIэгъэ зэ­Iу­кIэгъур зыфэгъэхьыгъагъэр рес­пуб­ли­кэм ипсэолъэшI лъэныкъо ыкIи цIыфхэр зычIэсыщтхэ унэхэм яшIын япхыгъэ Iофыгъохэр ары. Республикэм и ЛIышъхьэу КъумпIыл Мурат пшъэ­рылъ зэрэфишIыгъэм тетэу мы зэIу­кIэр зэрищагъ Адыгеим иминистрэхэм я Кабинет итхьаматэу КIэрэщэ Ан­заур.

ЗэIукIэр къызэIуихызэ КIэрэщэ Анзаур къызэрэхигъэщыгъэмкIэ, къалэр ущыпсэунымкIэ нахь гуIэтыпIэу хъунымкIэ, цIыфхэр зычIэсыщтхэ унэхэм яшIын нахь зегъэушъомбгъугъэнымкIэ ащ мэхьэнэ гъэнэфагъэ иI.

«Къэлэ щыIакIэр нахь гуIэтыпIэу хъу­ным республикэм лъэшэу анаIэ щытырагъэты. Адыгеим и ЛIышъхьэ а лъэныкъомкIэ IофшIэныр зэрэкIорэм ренэу лъэплъэ. КъумпIыл Мурат республикэм ихэбзэ къулыкъухэм анаIэ тырарегъэты цIыфхэм ящыIакIэ нахьышIу шIыгъэным пае федеральнэ гупчэм иамалхэр нахь икъоу къызфэгъэфедэгъэнхэм. Арышъ, компаниеу «ДОМ.РФ-м» дытиIэ зэдэлэжьэныгъэм нахь зедгъэушъомбгъуным тыфэхьазыр. Республикэм проектыкIэхэр щызэхэгъэуцогъэнхэмкIэ, цIыфхэр зы­чIэсыщтхэ унэ дэгъухэр шIыгъэнхэмкIэ, пIэлъэ кIэкIым къыкIоцI а Iофыгъоу къэу­цухэрэр зэшIохыгъэнхэмкIэ зэдэлэжьэныгъэ-зэгъусэныгъэм ишIуагъэ къэкIощт. Компанием дытиIэ зэдэлэжьэныгъэм тапэкIи нахь зиушъомбгъумэ, республикэм и ЛIышъхьэ къыгъэуцугъэ пшъэрылъхэу чIыпIэхэм язэтегъэпсы­хьанкIэ, къэлэ щыIакIэр нахьышIу хъунымкIэ зэшIохыгъэн фаехэр игъом гъэ­цэкIагъэ зэрэхъущтхэм сицыхьэ телъ», — къыIуагъ АР-м иминистрэхэм я Кабинет итхьаматэу КIэрэщэ Анзаур.

Компанием илIыкIохэм псэолъэшIыным зиушъомбгъунымкIэ ыкIи цIыфхэр зычIэсыщтхэ унэхэм яшIын нахь псынкIэу зэшIохыгъэнымкIэ амалэу щыIэхэм ащагъэгъозагъэх. Амыгъэкощырэ федеральнэ мылъкур къызфагъэфедэнымкIэ, ахъщэу апэIуагъэхьащтымкIэ проектхэр зэхэгъэуцогъэнхэмкIэ, къэралыгъом иIэпыIэгъу хэлъэу фэгъэкIотэныгъэр зылъапсэу щыт чIыфэтынымкIэ, инфраструктурнэ облигациехэр гъэфедэгъэнхэмкIэ, джырэ уахътэм диштэрэ лифтхэр аIэкIэгъэхьэгъэнхэмкIэ анахь мэхьанэ зиIэ лъэныкъохэм ягугъу ашIыгъ.
Адыгеим амыгъэкощырэ мылъкур щы­IугъэкIыгъэнымкIэ, ащ тегъэпсыхьэгъэ аукционхэр зэхэщэгъэнхэмкIэ мы лъэ­хъэнэ благъэхэм компаниер ягъусэу Iофтхьэбзэ гъэнэфагъэхэр зэшIуахыщтых. Къалэу Мыекъуапэ Келермесскэ гъогум дэжь чIыгу Iахьэу гектар фэдиз зиинагъэмкIэ апэрэ аукционыр шышъхьэIум и 11-м щыIэщт. Уасэу къызыпкъырыкIыщтхэр сомэ миллиони 8,4-рэ. ЯтIонэрэ чэзыур чIыгу Iахьэу гектар 0,2-рэ хъурэр ары зэпхыгъэр. Мыекъопэ районымкIэ псэупIэу Тульскэм ар къыхеубытэ, псэуа­лъэм квадрат метрэ 429,4-рэ еубыты. Ар шышъхьэIум и 25-м ащэщт, ублэпIэ уасэр сомэ миллиони 2,95-рэ.

Шъугу къэтэгъэкIыжьы: республикэмрэ мы компаниемрэ зэгъусэхэу 2021 — 2022-рэ илъэсхэм проект зэдызэха­гъэуцуагъ. Ащ диштэу паркэу «Мэздахэ», гектар 435-рэ фэдиз хъурэ чIыпIэм, изэтегъэпсыхьан идизайн-проект зэхагъэуцуагъ. Къалэу Мыекъуапэ икъушъхьэтхэу Нэгыежъ Iуашъхьэ унагъохэм языгъэпсэфыгъо уахътэ щагъэкIонэу амал щарагъэгъотыщт. Тыкъэзыуцухьэрэ дунаим икъэухъумэни проектым хэу­шъхьафыкIыгъэу анаIэ щытырагъэты: паркым зэрэпсаоу чъыг гори щыраупкIыщтэп, хэушъхьафыкIыгъэ чIыпIэхэр ары ныIэп псэолъэшIыным рагъэубы­тыщтхэр.

Мы зэIукIэгъум илъэхъан компанием иIофышIэхэм псэолъэшIынхэр зыщы­кIощт чIыпIэхэр зэрагъэлъэгъугъэх, хабзэм илIы­кIохэм ыкIи псэолъэшIыным фэгъэ­зэгъэщтхэм къафаIотагъэх цIыфхэр зы­чIэсыщтхэ унэхэм яшIын нахь зегъэу­шъомбгъугъэнымкIэ игъоу алъэгъурэ хэ­кIыпIэ-амалхэм афэгъэхьыгъэу.

АР-м и ЛIышъхьэ ипресс-къулыкъу