Экономикэм зыкъырагъэIэтыщт

Промышленнэ паркэу «Инэмрэ» зыгъэпсэфыпIэу «Лэгъонакъэрэ» ягъэпсын телъытэгъэ проект шъхьэ­IитIумэ ягъэцэкIэнкIэ пшъэрылъ заулэ Адыгеим и ЛIышъхьэу Къум­пIыл Мурат афишIыгъ.

АР-м иминистрэхэм я Кабинет и Тхьаматэу КIэрэщэ Анзаур къызэрэхигъэщыгъэмкIэ, республикэм ихэбзэ къулыкъухэм корпорациеу «Туризм. РФ» зыфиIорэмрэ Iахьзэхэлъ обществэу «Гъэхъунэ Плъыжьымрэ» зэдэлэжьэныгъэ пытэ адыряI. «Лэгъонакъэ» ипроект пае гектар 63,81-рэ зэлъызыубытырэ чIыгу Iахьхэу псэуалъэхэр зытырашIы­хьащтхэр агъэнэфагъэх. Гъогу картэр зэхагъэуцуагъ, планым диштэу зэкIэ Iофтхьабзэхэр агъэцакIэх. Апэрэ чэзыум къыдыхэлъытагъэу транспорт, инженер инфраструктурэр агъэпсынэу рахъухьэ. ЯтIонэрэ чэзыум гектар 14,5-мэ хьакIэщ инфраструктурэр ащагъэпсын ямурад. Ящэнэрэ чэзыум чIыпIэр зэрэщытэу зэтырагъэпсыхьанэу щыт. 2030-рэ илъэсым ехъулIэу лыжэкIэ къызыщачъыхьащт гъогу километрэ 37-рэ агъэпсыщт, кIэшIэгъэ кIэпсэ гъогухэр зэтырагъэпсыхьащтых.

Шъугу къэтэгъэкIыжьы зыгъэпсэфыпIэу «Лэгъонакъэр» зыщашIыщт чIыпIэр ЮНЕСКО-м идунэе кIэн хэхьэрэ псэуа­лъэхэм къызэрахимыубытэрэр. Респуб­ликэм ичIыопс баиныгъэ къаухъумэзэ псэолъэшIынхэр макIох. Капитальнэ псэолъэшIыпIэхэр Лэгъо-Накъэ къыхиубытэхэрэп. Ау кIэшIэгъэ кIэпсэ гъогухэм­рэ лыжэкIэ къызыщачъыхьащт гъогухэмрэ ар афэгъэхьыгъэп.

Инженер, транспорт инфраструктурэ дэгъу зиIэщт промышленнэ шъолъырэу «Инэм» изэтегъэпсыхьанкIэ Iофышхо зэшIуахыгъах. Ащ пае Тэхъутэмыкъое районым гектар 200 фэдиз къыщыхагъэ­кIыгъ. АР-м иминистрэхэм я Кабинет и Тхьаматэ игуадзэу ЛIыхэсэ Махьмуд Iофтхьабзэу зэрахьэхэрэм къатегущы­Iагъ.

Джыдэдэм магистральнэ сетьхэм, гъогухэм, электроэнергиер, псыр, газыр аIэкIэзыгъэхьащт псэуалъэхэм яшIын макIо. Джащ фэдэу федеральнэ проектэу «Акселерация субъектов малого и среднего предпринимательства» зыфиIорэм къыдыхэлъытагъэу котельнэ зыхэтыщт производственнэ унэ 2023-рэ илъэсым агъэпсынэу рахъухьэ. Промышленнэ шъолъырым электроэнергиер фикъуным пае Iахьзэхэлъ обществэу «Россети Кубань» зыфиIорэр ягъусэу энергетическэ инфраструктурэм игъэпсынкIэ Iоф­тхьэбзэ гъэнэфагъэхэр зэрахьэх. Джащ фэдэу 2021 — 2025-рэ илъэсхэм Адыгэ Республикэм ипсэупIэхэм газрыкIуапIэхэр арыщэгъэнхэмкIэ ыкIи гъэстыныпхъэ шхъуантIэр аIэкIэгъэхьэгъэнымкIэ программэм къыдыхэлъытагъэу Iахьзэхэлъ обществэу «Газпромым» игъусэхэу газ инфраструктурэр ящэлIэгъэнымкIэ Iоф­тхьабзэхэр зэхащэх.

Федеральнэ гупчэр яIэпыIэгъоу Iоф­тхьабзэу зэрахьэхэрэм Тэхъутэмыкъое районымкIэ промышленнэ шъолъырым ищыкIэгъэ инфраструктурэм игъэпсынкIэ амалхэр къатынэу мэгугъэх.

Адыгэ Республикэм социальнэ-экономикэ хэхъоныгъэ зэришIыщт унэе программэри мы проектхэм япхырыщын фэIорышIэ. АР-м экономикэ хэхъоныгъэм­рэ сатыумрэкIэ иминистрэу Шэуджэн Заур мы илъэсым программэр зэрагъэ­цакIэрэм фэгъэхьыгъэу къыIотагъ.

Министрэм къызэрэхигъэщыгъэмкIэ, 2024-рэ илъэсым нэс республикэм иунэе программэ диштэу промышленнэ шъолъы­рэу Тэхъутэмыкъое районым щашIыщтым сомэ миллиард 1,6-рэ пэIуагъэхьащт. ЫпэкIэ зэрэхагъэунэфыкIыгъагъэу, газрыкIуапIэм, псырыкIуапIэм ягъэпсынкIэ, псым иIущынкIэ IофшIэн гъэнэфагъэхэр агъэцакIэх. IофшIэнхэм япроцент 24-р аухыгъах. ЗыгъэпсэфыпIэу «Лэгъонакъэ» ипсэуалъэхэр электрическэ сетьхэм апышIэгъэнхэмкIэ инвесторым уасэу ытыгъэм къыфегъэгъэзэжьыгъэным ехьылIэгъэ Iофыгъоми хэплъэх.

Республикэм иунэе программэ къыдыхэлъытагъэу Мыекъуапэ дэтыгъэ аэропортым дэжь сабыибэ зэрыс унагъохэм чIыгу Iахьхэу къащыфыхагъэкIыгъэхэм яинженер инфраструктурэ гъэ­псыгъэным пае мыжъо-пшэхъо зэхэлъ зытелъыщт гъогухэр мыгъэ ашIыщтых. Республикэм псынкIэу хэхъоныгъэ езыгъэшIыщт унэе программэм игъэцэкIэн мэхьанэшхо зэриIэр Адыгеим и ЛIышъхьэ къыхигъэщыгъ.

«Мыщ фэдэ Iофыгъохэм язэшIохынкIэ Урысые Федерацием и Правительствэ IэпыIэгъушхо къытеты. Проект шъхьа­Iэхэм япхырыщынкIэ пшъэрылъэу зыфэтшIыжьыгъэхэр дгъэцэкIэнхэм пае ткIуачIэ къыхьырэр зэкIэ тшIэн фае. ШIогъэ шIукIае ахэм къакIэкIощт: рес­публикэм иэкономикэ зэхъокIыныгъэ фэшIыгъэным, инвестициехэр нахьыбэу къытхалъхьаным, IофшIэпIэ чIыпIакIэхэр бэу зэхэщэгъэнхэм ахэр афэIорышIэщтых», — къыIуагъ КъумпIыл Мурат.

АР-м и ЛIышъхьэ ипресс-къулыкъу