ЦIыфхэм яеплъыкIэхэр къыдалъы­тэхэзэ

Урысые Федерацием и Президентэу Владимир Путиным пшъэрылъ къызэрэфишIыгъэм тетэу Адыгеим и ЛIышъхьэу КъумпIыл Мурат къэралыгъом ипащэ ишъолъыр приемнэ цIыфхэр щыригъэблэгъагъэх.

А.Гусев.

ЗэIукIэм хэлэжьагъэх федеральнэ инспектор шъхьаIэу Сергей Дрокиныр, АР-м ипрокурорэу Игорь Шевченкэр, министерствэхэм яIэшъхьэтетхэр ыкIи муниципалитетхэм япащэхэр.

Шэуджэн ыкIи Мыекъопэ районхэм ащыпсэухэрэм республикэм и ЛIышъхьэ зыкъыфагъэзагъ. Iофыгъоу къаIэтыгъэхэр зыфэгъэхьыгъагъэхэр ежь ашъхьэкIэ зыгъэгумэкIыхэрэм ямызакъоу, общественнэ мэхьанэ зиIэхэри ары. Ахэм зыкIэ ащыщ псэупIэу Дахъом скверыр щызэтегъэпсыхьажьыгъэныр, кIэлэцIыкIухэм зызщагъэпсэфыщт, зыщыджэ­гущтхэ чIыпIэхэр гъэпсыгъэнхэр.

А лъэIумкIэ закъыфэзгъэзагъэр еджа­пIэм икIэлэегъадж. Республикэм фэхъу­рэ зэхъокIыныгъэхэм апае Адыгеим и ЛIышъхьэ зэрэфэразэр ащ къыIуагъ. Мыщ дэсхэми а зэхъокIыныгъэхэр дэгъоу зэхашIэх. ПсэупIэу Дахъом социальнэ ыкIи зекIоным епхыгъэ инфраструктурэм хэхъоныгъэ щешIы, кIэлэцIыкIухэр зыщыджэгущтхэ чIыпIэр щагъэпсыгъ, Iоныгъом и 1-м ехъулIэу еджа­пIэм игъэцэкIэжьын аухыщт, куль­турэм и Унэ игъэцэкIэжьынкIи проектыр агъэхьазыры. Общественнэ чIыпIэхэм язэтегъэпсыхьанкIэ Iофтхьабзэхэр зэшIуахых, ахэм зыкIэ ащыщ еджапIэм дэжь зыгъэпсэфыпIэ шъолъырыкIэ щышIыгъэныр. Мыекъопэ районым ипащэу Михаил Марьиным къызэриIуагъэм­кIэ, IофшIэнхэр къызэкIэлъэкIох, АР-м и ЛIышъхьэ къафишIыгъэ пшъэрылъхэр зэкIэ зэшIохыгъэ зэрэхъущтхэмкIи ащ къыгъэгугъагъ.

Къэралыгъо программэу «Къуаджэхэм хэхъоныгъэ ягъэшIыгъэныр» зыфиIорэм диштэу скверым изэтегъэпсыхьан макIо, мы илъэсым ыкIэм ехъулIэу ар аухыщт. Урамхэм якъэгъэнэфын, псырыкIуапIэ­хэм яшIын диштэрэ оборудованием ыуж итых. Футбол ешIэпIэ цIыкIу ашIыщт, лъэс гъогухэр агъэкIэжьыщтых, автотранспорт уцупIэхэр ашIыщтых.

Адыгэ Республикэм и ЛIышъхьэу КъумпIыл Мурат муниципалитетым ипсэупIэхэм яхэхъоныгъэ зэкIэлъыкIокIэ гъэнэфагъэ иIэу лъагъэкIотэным, амалэу щыIэхэр икъоу агъэфедэнхэм, къэралыгъо программэхэмрэ лъэпкъ проектхэмрэ къатырэ шIыкIэ-амалхэр зэкIэ къызфагъэфедэнхэм япхыгъэу пшъэрылъ къыгъэуцугъ. Ащ дакIоу сабыибэ зэрыс унагъохэу гъот макIэ зиIэхэм гъэстыныпхъэ шхъуантIэр аIэкIэгъэхьэгъэнымкIэ IэпыIэгъу зэрафэхъущтхэм тегъэ­псыхьэгъэ пшъэрылъхэм атегущыIагъэх.

«ЦIыфхэм гущыIэгъу тафэхъу, ащ ишIуагъэкIэ IэпыIэгъу зищыкIэгъэ цIыф­хэм тишIуагъэ ядгъэкIын тэлъэкIы, анахь зигъо Iофыгъохэу ахэм къаIэтыхэрэмкIэ хэкIыпIэхэм талъэхъу. Пстэуми апэу зэшIохыгъэн фэе пшъэрылъхэр ыкIи щыкIагъэу щыIэхэр дэгъэзыжьыгъэнхэмкIэ тынаIэ нахь зытедгъэтын фаехэр цIыфхэр тигъусэхэу итэхъухьэх. ГущыIэм пае, мы илъэсым къутырэу Чернышевым цIыфхэм зэIукIэгъоу щадысиIагъэм ыуж пшъэрылъэу афэсшIыгъагъэхэр гъэцэкIагъэ зэрэхъугъэхэм сылъыплъэжьыгъ. ПсэупIэм икъэгъэнэфынкIэ, чъыг-къэгъа­гъэхэр щыгъэтIысхьэгъэнхэмкIэ, еджапIэм игъэцэкIэжьынкIэ Iофтхьабзэхэм япхыгъэ IофшIэнышхо зэшIохыгъэ мэхъу, спорт джэгупIэми мылъку къыфыхагъэ­кIыгъах. Илъэсым ыкIэм ехъулIэу къутырэу Чернышевым культурэм и Унэу дэтым игъэцэкIэжьын тыухыщт. Муниципалитет пстэуми ащ фэдэ IофшIэнхэр ащыкIонхэ фае», — къыхигъэщыгъ КъумпIыл Мурат.

Адыгеим и ЛIышъхьэ цIыфхэр зырегъэблагъэхэм къаIэтыгъэ Iофыгъо пстэури гъэцэкIагъэ зыщыхъущтхэ пIалъэхэр афигъэнэфагъэх. Джащ фэдэу респуб­ликэм и ЛIышъхьэ пшъэрылъ афишIыгъ ренэу цIыфхэр упчIэжьэгъу ашIынхэу.

АР-м и ЛIышъхьэ ипресс-къулыкъу