ЗекIонми зыригъэушъомбгъущт

Шы лъэпкъ дэгъухэр зыхъухэрэм я Ассоциацие Адыгеим щызэхэщэ­гъэныр, республикэм шыгъачъэхэр щырегъэкIокIыгъэнхэр, адыгэ (къэ­бэртэе) шы лъэпкъхэр къэухъумэ­гъэнхэр — ахэм ыкIи нэмыкI Iофыгъохэм щатегущыIагъэх Iэнэ хъураеу Адыгеим и ЛIышъхьэу КъумпIыл Му­рат зыхэлэжьагъэм. Адыгэ рес­публикэ ипподромым а зэIукIэгъур щыкIуагъ.

 А. Гусев. 

Iофтхьабзэм хэлэжьагъэх Темыр-Кавказ ыкIи Къыблэ федеральнэ шъолъырхэмкIэ Iахьзэхэлъ обществэу «Росипподромым» ипащэу Сэкърэкъо Заур, АР-м мэкъу-мэщымкIэ иминистрэу Къуа­нэ Анзаур, АР-м физическэ культурэмкIэ ыкIи спортымкIэ и Комитет итхьаматэу Дэгужъые Мурат, шы спортымкIэ спорт еджапIэм ипащэхэр, ­Адыгэ Республикэм ветеринариемкIэ и ГъэIорышIапIэ, джащ фэдэу Адыгеим икъэралыгъо бюджет учреждениеу «Стройзаказчикым» яIэшъхьэтетхэр, шы спор­тымкIэ тренерхэр, республикэм шы лъэпкъ дэгъухэр щызыхъухэрэр.

Адыгеим и ЛIышъхьэ къызэрэхигъэщыгъэмкIэ, республикэм шы лъэпкъ дэгъухэр зыхъухэу исхэм япчъагъэ хэхъо, ахэр шыхъунымрэ шы спортым зегъэушъомбгъугъэнымрэ чанэу адэлажьэх, адыгэ (къэбэртэе) шы лъэпкъхэм якъыхэхын ыуж итых.

«Спортым изы лъэныкъохэм ащыщэу шыхъуныр, ижъырэ шы лъэпкъхэр къэу­хъумэгъэнхэр, а лъэныкъомкIэ хэбзэ шIагъоу щыIэ хъугъэхэм зягъэушъомбгъу­гъэныр непи ищыкIагъ. Ар къеушыхьаты Адыгеим имызакъоу, нэмыкI чIыпIэхэми шыхъуным анаIэ зэращытырагъэтырэм, шыхэр зиунаеу щытхэм япчъагъи нахь зэрэхахъорэм. ТиныбжьыкIэхэм мы аужырэ лъэхъаным шыхъуным нахь анаIэ тырадзагъ. Тэ тыхьазыр а лъэныкъомкIэ тишIуагъэ къэдгъэкIонэу ыкIи респуб­ликэм а Iофым нахь зыщиушъомбгъуным тынаIэ тедгъэтынэу», — къыIуагъ КъумпIыл Мурат.

ЗэIукIэгъум илъэхъан шы лъэпкъышIу­хэм яхъун фэгъэзагъэхэм я Ассоциацие республикэм щызэхэщэгъэным иIофыгъохэм анэсыгъэх. Къызэрэхагъэщыгъэм­кIэ, шы спорт зэнэкъокъухэу нэмыкI шъолъырхэм ащыкIохэрэм ахэлэжьэнхэмкIэ, шыхэм къакIахъохэрэр Iыгъы­гъэнхэм мылъку пэIугъэхьэгъэнымкIэ, хъупIэхэр зэтегъэпсыхьэгъэнхэмкIэ, рес­публикэм шыгъачъэхэр щызэхэщэ­гъэнхэмкIэ ыкIи нэмыкIыбэхэмкIэ Iоф­тхьэбзэ гъэнэфагъэхэр зэшIуахыщтых.

АР-м и ЛIышъхьэу КъумпIыл Мурат мэкъу-мэщымкIэ Министерствэм, спорткомитетым пшъэрылъ афишIыгъ Ассоциациеу зэхащэрэмкIэ яшIуагъэ къа­гъэкIонэу. Спорт еджапIэм ипащэхэми джащ фэдэу пшъэрылъ афишIыгъ ип­подромыр зэдагъэфедэнымкIэ игъоу алъэгъухэрэр къахалъхьанхэ Республикэ ипподромым игъэфедэн, ар мылъку-­техникэ лъэныкъомкIэ зэ­тегъэпсыхьэгъэным япхыгъэ Iофыгъохэм шъхьафэу къащыуцугъэх. КъумпIыл Мурат пшъэрылъ афишIыгъ шыхэр къызщызэпэ­чъэщтхэ гъогур агъэцэ­кIэ­жьынэу, ипподромым итрибунэ зэтырагъэпсыхьанэу, манежыр зыпкъ рагъэуцожьынэу ыкIи шыхэм япхыгъэ спорт еджапIэм игубгъохэр нахь зэтыра­гъэпсыхьанхэу.

 А. Гусев. 

Республикэм испорт комитетрэ «Стройзаказчикымрэ» япащэхэм къа­Iотагъ ипподромым изэ­те­гъэпсыхьан ипроект игъэ­хьазырын зэрэкIорэр. Адыгеим и ЛIышъхьэ пшъэ­рылъ афишIыгъ документхэм ягъэхьазырын нахь агъэпсынкIэнэу, респуб­ли­кэм имызакъоу, нэмыкI шъолъырхэм ащыкIощт шы зэнэкъокъухэм къапкъырыкIырэ джырэ пшъэрылъхэр ыкIи шапхъэхэр зэкIэ проектым къыщыдалъытэнхэу. Iахьзэхэлъ обществэу «Росипподромым» ипащэу Сэкърэкъу Заур къызэригъэгугъагъэхэмкIэ, Адыгеим ипащэхэмрэ Ассоциациеу зэхащэрэмрэ игъоу алъэгъухэрэр къыдалъы­тэщтых ыкIи IэпыIэгъу ахэм къафэхъущтых.

Шы спортымкIэ еджапIэм ипащэхэм къаIуагъ шыгъачъэхэм ахэлэжьэщтхэр, шыхэм атесхэу яIэпэIэсэныгъэ къызэрагъэлъэгъощт шIыкIэм епхы-
гъэ къулайныгъэхэр аIэ къызщырагъэхьащтхэ отделение къызэIухыгъэн зэ­рэфаем фэгъэхьыгъэу.

Мы Iофтхьабзэм къе­кIолIагъэхэу шы лъэпкъы­шIухэр зыхъухэрэм зы­фызэдырагъэштагъэр ащ фэдэ отделение еджапIэм къызыщызэIуахкIэ адыгэ (къэбэртэе) шы лъэпкъхэм якъэухъумэнкIэ ыкIи яхэ­хъоныгъэкIэ ишIуагъэ къы­зэрэкIощтыр ары. Спорт­сменкэу, шыгъачъэхэм ахэлэжьэрэ Тембот Дианэ мы Iофтхьабзэм хэла­жьэ­хэрэр нэIуасэ фашIыгъэх. АдыгеимкIэ апэрэу ащ «шыгъачъэхэр» зыфиIорэ лъэныкъомкIэ спортым имастерынымкIэ кандидат шапхъэхэр ыгъэцэкIагъэх, ащ дакIоу Урысыем апэрэ чIыпIэр къыщыдэ­хыгъэным фэгъэхьыгъэ зэнэкъокъум республикэр къыщигъэлъэгъоным ифитыныгъэ къыратыгъ. КъумпIыл Мурат Дианэ къыритыжьыгъ шапхъэхэр зэригъэцэкIагъэхэр къэзыу­шы­хьатырэ тхылъыр, спорт­сменкэ ныбжьыкIэм гъэ­хъагъэу ышIыхэрэм апае къыфэгушIуагъ ыкIи тапэ-
кIи щыIэщт зэнэкъокъухэм текIоныгъэр къащыдихынэу къыфэлъэIуагъ.

Мы зэIукIэгъум общест­веннэ организациеу «Шыу хасэм» ипащэхэм къыща­Iотагъ адыгэ (къэбэртэе) шы лъэпкъыр зэлъягъэшIэгъэнымкIэ Iофэу ашIэрэр. Илъэси 5 фэдиз хъугъэу «Шыу хасэм» хэтхэр хэлажьэх Дунэе шы къэгъэлъэгъонэу «Иппосфера» зыфиIорэм. БэмышIэу Санкт-Петербург щыкIуагъэм джыри зэ ахэм анаIэ къатырарагъэдзэн алъэ­кIыгъ адыгэ (къэбэртэе) шы лъэпкъым.

ТапэкIи а спорт лъэпкъым зегъэушъомбгъугъэным къыдыхэлъытагъэу «Шыу хасэм» хэтхэм къа­Iуагъ Мыекъопэ районым ит псэупIэу Дахъом пэблагъэу къушъхьэ лъапэхэм адэжь шыухэм яIэпэIэ­сэныгъэ къэгъэлъэгъогъэнымкIэ гупчэ щызэхащэным зэрэфэхьазырхэр. Республикэм и ЛIышъхьэ къыхигъэщыгъ а проектыр гъэхъагъэ хэлъэу гъэцэкIагъэ зыхъукIэ шIогъабэ къы­зэрихьыщтым нэмыкIэу республикэм зекIоным тапэкIи нахь зыщиушъомбгъунымкIи амал дэгъу зэрэхъущтыр.
ЗэIукIэгъум икIэуххэр зэфихьысыжьхэзэ, КъумпIыл Мурат зэкIэ Iофыгъоу зытегущыIагъэхэмкIэ пшъэ­рылъ гъэнэфагъэхэр афи­шIыгъэх, пстэуми апэу зэ­шIохыгъэн фаехэр зы­фэгъэхьыгъагъэхэр АР-м мэкъу-мэщымкIэ и Ми­нистерств, АР-м испорт комитет, АР-м икъэралыгъо бюджет учреждениеу «Стройзаказчикыр» ары.

АР-м и ЛIышъхьэ ипресс-къулыкъу