Адыгэ Республикэм щыпсэухэу лъытэныгъэ зыфэтшIыхэрэр!
ТилъэпIэ предпринимательхэр!
Урысые предпринимательствэм и Мафэ фэшI тышъуфэгушIо!
ЦIыф чанхэу гъэпсын IофшIэным ыкIи зэхэщэным, республикэмрэ къэралыгъомрэ яхэхъоныгъэ зиIахьышIу хэзышIыхьэхэрэм мыр ямэфэкI.
ЩыIэныгъэм илъэныкъо зэфэшъхьафхэм ахэлажьэхэзэ, предпринимательхэм джырэ экономикэм ихэхъоныгъэкIэ пшъэдэкIыжь ин ахьы, зигъо Iофыгъохэу уахътэм къыгъэуцухэрэр зэшIохыгъэнхэмкIэ IэпыIэгъу мэхъух, IофшIэпIэ чIыпIакIэхэр зэхащэх, цIыфхэм ящыкIэгъэ товархэмрэ фэIо-фашIэхэмрэ арагъэгъотых, социальнэ зыпкъитыныгъэр къэухъумэгъэным яIахь хашIыхьэ.
Предпринимательствэ цIыкIумрэ гурытымрэ хэхъоныгъэ ашIынымкIэ ящыкIэгъэ амалхэр ягъэгъотыгъэнхэм иIофыгъо Адыгэ Республикэм лъэшэу анаIэ щытырагъэты. Административнэ пэрыохъуныгъэхэр щыгъэзыегъэнхэмкIэ ахэм чанэу IофшIэнхэр зэшIуахых, мылъку IэпыIэгъу араты, предпринимательхэм яIоф нахь кIэкIынымкIэ, нахь зиушъомбгъунымкIэ грантхэр аIэкIагъахьэх.
Предпринимательствэм ихэхъоныгъэкIэ Iофтхьабзэхэу зэшIошъухыхэрэм республикэм щыпсэухэрэм ящыIэныгъэ нахьышIу хъунымкIэ, экономикэмрэ социальнэ лъэныкъомрэ хэхъоныгъэ ашIынымкIэ яшIуагъэ къызэрэкIощтым тицыхьэ телъ.
Адыгеим ипредприниматель пстэуми тыгу къыддеIэу тафэлъаIо псауныгъэ пытэ, щыIэкIэшIу яIэнэу, ямурадышIухэр къадэхъунхэу, Iофэу зыфэгъэзагъэхэм гъэхъагъэхэр щашIынхэу, лъэгэпIакIэхэм къафэкIонхэу!
Адыгэ Республикэм и ЛIышъхьэу, Урысые политическэ партиеу “Единэ Россием” и Адыгэ шъолъыр къутамэ и Секретарэу КъумпIыл Мурат
Адыгэ Республикэм и Къэралыгъо Совет — Хасэм и Тхьаматэу Владимир Нарожнэр