Коронавирусым ыпкъ къикIыкIэ гъэлъэшыгъэ шIыкIэм тетэу Iоф зэрашIэн фэегъэ режимэу 2020-рэ илъэсым гъэтхапэм и 18-м агъэуцугъагъэр АР-м и ЛIышъхьэу КъумпIыл Мурат 2023-рэ илъэсым жъоныгъуакIэм и 24-м ышIыгъэ УказымкIэ Адыгеим щытырахыжьыгъ.
Республикэм исхэмрэ ащ ихьакIэхэмрэ коранавирусым щыухъумэгъэнхэм пай ащ фэдэ шапхъэм зыкIытехьэгъагъэхэр.
Адыгэ Республикэм и ЛIышъхьэ и Указ диштэу зигугъу къэтшIыгъэ режимыр зэрэтырахыжьыгъэм имызакъоу, цIыф жъугъэхэр, организациехэр общественнэ Iофтхьабзэхэм зэрахэлэжьэщтхэ шапхъэхэр зыщыгъэнэфэгъэгъэ актхэми кIуачIэ ямыIэжь хъугъэ.
Шъугу къэтэгъэкIыжьы коронавирусым зызэриушъомбгъущтыгъэм епхыгъэу 2020-рэ илъэсым щылэ мазэм и 30-м зэрэдунаеу щынэгъошхо къызэрэшъхьэщыхьагъэмкIэ официальнэу макъэ къызэрагъэIугъагъэр. 2023-рэ илъэсым жъоныгъуакIэм и 4-м ошIэ-дэмышIэ IофхэмкIэ комитетым я 15-рэ зэIукIэу зэхищагъэм, псауныгъэм икъэухъумэнкIэ Дунэе организацием ипащэ игъо щыфилъэгъугъ гумэкIыгъошхо зэрэщымыIэжьымкIэ макъэ къыгъэIунэу. Псауныгъэм икъэухъумэнкIэ Дунэе организацием жъоныгъуакIэм и 5-м макъэ къыгъэIугъ Iофхэр зыпкъ зэриуцожьыгъэхэм епхыгъэу зытехьэгъэгъэхэ режимым зэрэтекIыжьхэрэмкIэ.