«Адыгэ Республикэм гъэсэныгъэмкIэ амалышхохэр иIэх. ТикIэлэегъэджэ, шIэныгъэлэжь цIэрыIохэм осэшхо афашIы, къэралыгъо тынхэмрэ щытхъуцIэхэмрэ къафагъэшъуашэх. Урысыем и Президентэу Владимир Путиным бэмышIэу Мыекъопэ гимназиеу N 22-м икIэлэегъаджэу Трофименко Мария Николай ыпхъум щытхъуцIэу «Урысые Федерацием изаслуженнэ кIэлэегъадж» зыфиIорэр къызэрэфагъэшъошагъэр къэзыушыхьатырэ тхылъыр къыритыжьыгъ», — къыIуагъ Адыгеим и ЛIышъхьэ.
ШIухьафтыныр къаратын алъэкIыщт лекторхэм, кIэлэегъаджэхэм, блогерхэм, гъэсэныгъэм тихэгъэгу зыщегъэушъомбгъугъэным фэлэжьэрэ тренерхэм. Джащ фэдэу просветительскэ проектхэмкIэ: тхылъхэмкIэ, IофтхьабзэхэмкIэ, блогхэмкIэ, фильмхэмкIэ, форумхэмкIэ ащ фэдэ шIухьафтыныр къафагъэшъуашэ. ЦIыфхэм ягъэсэныгъэ, яшIэныгъэ, якультурэ зыкъезыгъэIэтырэ проектхэр зыгъэцэкIэрэ организациехэри ащ фэдэ зэнэкъокъум хэлэжьэнхэ алъэкIыщт.
«Знание. Премия» зыфиIорэ шIухьафтыныр зыфагъэшъуашэхэрэр гъэхъэгъэшхо зиIэхэр, опытэу яIэмкIэ Урысыем иIофышIэхэм адэгуащэхэрэр, проектхэм ягъэцэкIэнкIэ гъусэхэр къэзыгъотыхэрэр ары. Лъэныкъо 17-кIэ: «Тарихъыр», «Университетыр», «Наукэмрэ технологиемрэ», «Экономикэр, бизнесыр, правэр», «Культурэмрэ искусствэмрэ», «Гурыт еджапIэр», «ЕгъэджэкIо-гъэсакIор» зыфиIохэрэмкIэ ыкIи нэмыкIхэмкIэ тынхэр афагъэшъошэщтых.
«Республикэми, хэгъэгуми гъэсэныгъэмрэ наукэмрэ зызэращарагъэушъомбгъурэм детэгъаштэ. ТикIэлэегъаджэхэми, наукэм иIофышIэхэми Къэралыгъо Кремлевскэ дворецым финалэу щыкIощтым Адыгеир гъэхъагъэ хэлъэу къызэрэщагъэлъэгъощтым сицыхьэ телъ», — къыIуагъ КъумпIыл Мурат.
Хэгъэгум ипросветительскэ шIухьафтын шъхьаIэ зыфэгъэшъошагъэмэ хъущтхэр мэкъуогъум и 5-м нэс Урысые обществэу «ШIэныгъэм» исайт щатхыщтых.