ЕджапIэр къэзыухыхэрэм зыкI къэралыгъо ушэтынхэр неущ, жъоныгъуакIэм и 26-м, атынхэу аублэщтых.
Ежь яшIоигъоныгъэкIэ кIэлэеджакIохэм къыхахыгъэ предметищыр — химиер, географиер ыкIи литературэр непэ атыщтых.
ЗэкIэмкIи ушэтынхэм АдыгеимкIэ кIэлэеджэкIо 458-рэ ахэлэжьагъ. Химиер нэбгырэ 281-мэ, литературэр — 109-мэ ыкIи географиер — 68-мэ атыгъэх.
ХимиемкIэ ушэтыныр пкIугъэу алъытэным пае балл 36-рэ нахь мымакIэу къэпхьын фае. ЛитературэмкIэ анахь балл макIэр 32-м къыщыкIэ хъущтэп. ГеографиемкIэ ушэтыныр пкIугъэу алъытэным пае балл 37-рэ нахь мымакIэу ибгъэкъун фае.
Непэ ушэтынхэр зыщатырэ еджэпIи 8-мэ Iоф ашIэ.
Джы зэкIэми шIокI имыIэу атын фэе предметхэу урысыбзэмрэ хьисапымрэ къызэкIэлъыкIощтых. Урысыбзэр жъоныгъуакIэм и 29-м, хьисапыр мэкъуогъум и 1-м атыщтых.
ГеографиемкIэ, химиемкIэ ыкIи литературэмкIэ ныбжьыкIэхэм зызэраушэтыгъэм икIэуххэр мэкъуогъум и 13-м къараIожьыщтых.
ДЕЛЭКЪО Анет.