ЖъоныгъуакIэм и 23-м Мыекъопэ районым ит псэупIэхэу Шэнтыкъо, Цветочнэм, Подгорнэм ыкIи Тимирязевым, жъоныгъуакIэм и 24-м псэупIэхэу Кужорскэм, Абдзэхэхьаблэ ыкIи Мыекъуапэ ошъушхо къащехыгъ.
АР-м граждан зыкъэухъумэжьынымкIэ ыкIи ошIэ-дэмышIэ IофхэмкIэ и Комитет къызэрэщаIуагъэмкIэ, цIыфхэм лъэIоу къатыгъэм къыпкъырыкIыхэзэ муниципальнэ комиссиехэм мы уахътэм зэрарыр къалъытэ. ПэшIорыгъэшъэу пчъагъэхэмкIэ, Мыекъопэ районым ит мэкъумэщ хъызмэтшIэпIищмэ, унэе псэупIи 8-мэ ошъум иягъэ аригъэкIыгъ, зы нэбгырэ шъобжхэр тещагъэхэ хъугъэ.
Джащ фэдэу ощхышхоу щыIагъэм ыпкъ къикIэу псыхъоу Фарзэ къызеум, Краснодар краим и Мостовской район ифедеральнэ автомобиль гъогоу Мыекъуапэ пхырыкIырэм телъыгъэ лъэмыджыр зэщигъэкъуагъ. Ащ къыхэкIэу машинэхэр рыкIонхэ амылъэкIэу къызэтеуцуагъэх.
Адыгеим икъэралыгъо автоинспекцие икъулыкъушIэхэм мы чIыпIэм Iоф щашIэ, Мыекъуапэ икIырэ автомобильхэр станицэу Кужорскэм пхырагъэкIыхэзэ КощхьаблэкIэ агъакIох.
Псыхъом икъуладжэ игъэкъэбзэнкIэ аварийнэ къулыкъухэм Iоф ашIэ. Лъэмыджыр зыщагъэтэрэзыжьыщт пIалъэр къаIонэу ашIэрэп, мы уахътэм гъэцэкIэжьынхэр макIох.
Автоинспекцием икъулыкъушIэхэр водительхэм къяджэ, гъогу-патруль къулыкъум иIофышIэхэм унашъоу къафашIырэр дэх имыIэу агъэцэкIэнэу, пэшIорыгъэшъэу зэрэкIощтхэ гъогур агъэнэфэнэу.
КIАРЭ Фатим.