Адыгэ Республикэм фэгъэхьыгъэ программэу «Поедем, поедим!» зыфиIорэр телеканалэу НТВ-м иэфир жъоныгъокIэ мазэм и 27-м пчэдыжьым сыхьатыр 8.20-м къихьащт.
АР-м культурэмкIэ и Министерствэ къызэрэщаIуагъэмкIэ, телезещакIоу ыкIи итальянскэ пщэрыхьакIоу Федерико Арнальди зыхэт купыр мэлылъфэгъум и 17-м къыщегъэжьагъэу и 21-м нэс Адыгеим щыIагъ, программэр щытырихыгъ. НТВ-м къикIыгъэ купым анаIэ тырагъэтыгъ Адыгеим культурэмкIэ и Гупчэрэ АР-м культурэмкIэ и Министерствэрэ.
НТВ-м исъемочнэ куп хэтхэм адыгэ шхыныгъохэм нэIуасэ зафашIыгъ, адыгэ къуаем иихыкIэ зэрагъэшIагъ, ар непэрэ мафэм Урысыем щызэлъашIэрэ мыхьамел хъугъэ. Адыгеим икъушъхьэтх ыкIи ипсыхъо къаргъохэм, идунэе дахэ телевидением иIофышIэмэ зыщагъэгъозагъ, адыгэхэр хьакIэмэ зэрапэгъокIыхэрэр, зэрагъэлъапIэхэрэр ашъхьэкIэ зэхашIагъ. НахьыбэмкIэ ахэр зыдэщыIагъэхэр Мыекъопэ, Тэхъутэмыкъое ыкIи Шэуджэн районхэр ары, тыдэкIи адыгэ лъэпкъ шхыныгъохэм ащыхэIагъэх.