«Студенческэ пащэр-2023-рэ» зыфиIорэ Урысые зэнэкъокъум иапэрэ едзыгъо Адыгэ къэралыгъо университетым щеджэрэ Раиса Калачевам текIоныгъэр къыщыдихыгъ.
Апшъэрэ гъэсэныгъэ зыщызэрагъэгъотырэ еджапIэу республикэм итхэм ячIыпIэ профсоюз организациехэм ялIыкIо нэбгырибл зэнэкъокъум ишъолъыр едзыгъо хэлэжьагъэх. Адыгэ къэралыгъо университетым естествознаниемкIэ ифакультет ипрофсоюз бюро къэзыгъэлъэгъогъэ Раиса Калачевам текIоныгъэр къыдихыгъ.
Зэнэкъокъум къыдилъытэрэ лъэныкъохэм ащыщыгъэх хэбзэ-унашъохэм афэгъэхьыгъэ ушэтынхэр, Урысые Федерацием ихэбзэгъэуцугъэхэм ахэпшIыкIыныр, гъэIорышIакIомэ язэдэгущыIэгъу-зэпэуцужьхэм уахэлэжьэныр. ЗэкIэмэ анахь дэгъоу ушэтынхэр зыкIугъэр Раиса Калачевар ары, зэнэкъокъум икъыкIэлъыкIорэ едзыгъо Адыгеир ащ къыщигъэлъэгъощт.
«Студенческэ пащэр» зыфиIорэ Урысые зэнэкъокъур 2003-рэ илъэсым къыщегъэжьагъэу зэхащэ. 2007-рэ илъэсым къыщегъэжьагъэу апэрэ едзыгъохэр шъолъырхэм ащырагъэкIокIых. Зэнэкъокъум пшъэрылъэу иIэр сэнаущыгъэ зыхэлъ ныбжьыкIэхэу тапэкIэ ныбжьыкIэ политикэм игъэпсын хэлэжьэн зылъэкIыщтхэр къыхэгъэщыгъэнхэр ары.