Я III-рэ Дунэе форумэу «Къыблэ Урысыемрэ Темыр Кавказымрэ ягъэсэныгъэ урысыбзэм чIыпIэу щиубытырэр» зыфиIорэр Адыгэ къэралыгъо университетым щырекIокIыгъ.
Aщ шIэныгъэлэжьхэу, кIэлэегъаджэхэу, студентхэу ыкIи аспирантхэу Белоруссием, Китай, Кореем ыкIи Урысыем ишъолъыр 17-мэ къарыкIыгъэхэр хэлэжьагъэх. Форумым къекIолIагъэхэр ономастикэм итеорие епхыгъэ непэрэ гумэкIыгъохэм атегущыIэщтых.
Форумым изэхэщакIохэр Адыгэ къэралыгъо университетымрэ Дагъыстан къэралыгъо университетымрэ. Урысыбзэмрэ литературэмрэ якIэлэегъаджэхэм я Дунэе ассоциациерэ урысыбзэмрэ литературэмрэ якIэлэегъаджэхэм я Урысые обществэрэ яIэпыIэгъух.
Форумым къыдыхэлъытагъэу конференциер рагъэкIокIыгъ, ар шъолъыр ономастикэу «Я II-рэ НэмытIэкъо егъэджэнхэр» зыфиIорэм фэгъэхьыгъ, гуманитар ушэтынхэмкIэ Адыгэ республикэ институтэу КIэрэщэ Тембот ыцIэ зыхьырэм шIэныгъэхэмкIэ иIофшIэкIо шъхьаIэу ЕмыкI Нурджан итхылъэу «КъохьэпIэ Черкесием итарихъ топонимие» зыфиIорэм лъэтегъэуцо щыфашIыгъ. Джащ фэдэу шIэныгъэлэжь ныбжьыкIэ-хэм азыфагу щызэхащэгъэ зэнэкъокъум зэфэхьысыжьхэр фашIынхэу, урысыбзэр еджапIэм зэрэщарагъэхьырэм фэгъэхьыгъэ семинар зэхащагъ, секциехэм, зыщызэдэгущыIэжьыщтхэ площадкэхэм Iоф ашIагъ. Шъолъыр топонимикэм, литературнэ ономастикэм иIофыгъохэм, фольклорнэ ономастикэу Урысыем и Къыблэ ыкIи Темыр Кавказым илъэпкъхэм яIэхэм форумым хэлажьэхэрэр атегущыIагъэх, зэхафыгъэх. Социолингвистическэ лъапсэу непэрэ урысыбзэм фэхъугъэхэм ягугъу ашIыгъ.
Конференцием къырахьылIэрэ статьяхэмкIэ ыкIи анахь IофшIэгъэ дэгъухэмкIэ нэужым тхылъ зэхагъэуцощт ыкIи къыдагъэкIыжьыщт.
Шъугу къэдгъэкIыжьын, мы зигугъу къэтшIыгъэ Iофыгъохэм Адыгэ къэралыгъо университетыр запылъыр илъэс тIокI хъугъэ. Апэрэ шIэныгъэ конференциер профессорэу НэмытIэкъо Розэ игукъэкIыкIэ зэхащэгъагъ. 1998-рэ илъэсым къыщыублагъэу илъэситIум зэ мыщ фэдэ Iофтхьабзэхэр АКъУ-м щырагъэкIокIых, нэужым ащ «НэмытIэкъом иегъэджэнхэр» фаусыжьыгъ.
НэмытIэкъо Розэ Юсыф ыпхъур (1936 — 2016) филологие шIэныгъэхэмкIэ доктор, АКъУ-м филологиемкIэ ифакультет урысыбзэмкIэ икафедрэ ипрофессорэу, Адыгэ Республикэм ыкIи Пшызэ шъолъыр шIэныгъэхэмкIэ язаслуженнэ IофшIэкIошхоу, IофшIэгъэ 220-м ехъурэмэ яавторэу щытыгъ. Ащ игукъэкIыкIэ АКъУ-м шъолъыр ономастикэм изэгъэшIэнкIэ Темыр Кавказым и Координационнэ гупчэ щызэхащэгъагъ, шIэныгъэ конференциеу «Шъолъыр ономастикэм игумэкIыгъохэр» щырагъэкIокIыхэу аублэгъагъ.
Адыгэ къэралыгъо университетым ипресс-къулыкъу