2023 — 2024-рэ илъэсхэм Москва и ВДНХ дунэе къэгъэлъэгъон-форумэу «Урысыер» зыфиIорэр щызэхащэнэу УФ-м и Президентэу Владимир Путиным пшъэрылъ афишIыгъ.
Урысые Федерацием и Президент и Указэу N 215-р зытетымкIэ форумым изэхэщэн фэгъэзэгъэщт комитетыр зэхащагъ, Урысыем и Президент и Администрацие ипащэ иапэрэ гуадзэу Сергей Кириенкэр ащ итхьаматэу агъэнэфагъ.
Къэгъэлъэгъоным изыфэгъэхьазырын Адыгеим щыфежьагъэх. Республикэм и ЛIышъхьэу КъумпIыл Мурат пшъэрылъ зэрафишIыгъэм тетэу зэхэщэкIо комитет Адыгейми щызэхащагъ. АР-м иминистрэхэм я Кабинет и Тхьаматэ игуадзэу ЛIыхэсэ Махьмуд ащ ипащэу агъэнэфагъ.
Урысыем и Президент и Указ зэрэщыхэгъэунэфыкIыгъэмкIэ, форумыр зыфэIорышIэщтыр промышленностым, энергетикэм, агропромышленнэ комплексым, транспортым, псэолъэшIыным, наукэм, культурэм алъэныкъокIэ хэгъэгум гъэхъэгъэшхоу иIэхэр, Урысые Федерацием ишъолъырхэм хэхъоныгъэ ашIынымкIэ, Урысыем нэмыкI хэгъэгухэм зэдэлэжьэныгъэу адыриIэр лъигъэкIотэнымкIэ амалышIоу щыIэхэр къэгъэлъэгъогъэнхэр ары.
«Мы Iофтхьэбзэшхом зэрэхэлэжьэщтым ишIуагъэкIэ республикэм нахьыбэу инвестициехэр къыхалъхьан алъэкIыщт. Джащ пае тэ зэрэтфэлъэкIэу форумыр къызфэдгъэфедэн фае Адыгеим гъэхъагъэу, амалэу иIэхэр къэдгъэлъэгъонхэм пае, — къыIуагъ республикэм и ЛIышъхьэу КъумпIыл Мурат. — Форумэу «Урысыер» зыфиIорэм зыфэдгъэхьазыр зыхъукIэ, лъэныкъо пстэури къыдэтлъытэн фае республикэм гъэхъагъэу иIэхэр, Адыгеим ипроектхэр къэдгъэлъэгъонхэм пае. Тиэкспозицие гъэшIэгъонэу, агу къинэжьэу дгъэпсын фае».
ЗэхэщэкIо комитетым изэхэсыгъоу ЛIыхэсэ Махьмуд тхьамэтагъор зыщызэрихьагъэм къэгъэлъэгъон-форумэу «Урысыем» изыфэгъэхьазырын епхыгъэ Iофыгъохэм щахэплъагъэх, Адыгэ Республикэм иэкспозициехэм ятеплъэ зыфэдэщтым щытегущыIагъэх.
Республикэм иэкспозицие пае квадрат метрэ 85-рэ къыхагъэкIыгъ. Интерактивнэ экранхэр, зыгъэпсэфыпIэу «Лэгъонакъэ» имакет, проектхэм яэкспонатхэр, лъэпкъ Iэпэщысэхэр, лъэпкъ нэшанэ зиIэ пкъыгъохэр ащ щагъэуцунхэу рахъухьэ. Мастер-классхэр зыщызэхащэщт, зэдэгущыIэгъухэр зыщызэдашIыщт чIыпIи ащ къыщыхагъэкIыщт.
Адыгеир зэрыгушхохэрэм ащыщ адыгэ къуаем ифестивалэу зэхатщэрэр, самбэмкIэ, дзюдомкIэ Мыекъопэ еджапIэр, Еутых Асе и Дышъэ ордэунэ, республикэ естественнэ-хьисап еджапIэр, пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Мирный-Адыгея» зыфиIоу пчэныщэ къыдэзыгъэкIырэр, Адыгеим лъэпкъ къашъомкIэ и Къэралыгъо академическэ ансамблэу «Налмэсыр». Культурэмрэ гъэсэныгъэмрэ зягъэушъомбгъугъэным тегъэпсыхьэгъэ программэми, тематическэ мафэхэм ялъэхъан экспозициехэм Iоф зэрашIэщтми лъэшэу анаIэ атырагъэтыщт.
Зэхэсыгъом зэхэщэкIо комитетым хэтхэм игъо щафалъэгъугъ Адыгеим иэкспозицие изэтегъэпсыхьанкIэ япредложениехэр къахьынхэу.
Дунэе къэгъэлъэгъон-форумэу «Урысыер» 2023-рэ илъэсым шэкIогъум и 4-м къызэIуахыщт. Урысые Федерацием ишъолъырхэр, гъэцэкIэкIо хабзэм ифедеральнэ къулыкъухэр, общественнэ организациехэр, къэралыгъо корпорациехэр, IэкIыб къэралыгъохэм ялIыкIохэр ащ хэлэжьэщтых.
АР-м и ЛIышъхьэ ипресс-къулыкъу