Республикэм и Правительствэ зычIэт унэм Фондэу «ЗэкIэ ТекIоныгъэм пай» зыфиIорэр зызэхащагъэм и Мафэ фэгъэхьыгъэ Iофтхьабзэ щыкIуагъ. Фондым иIофшIэн зиIахьышхо хэзышIыхьагъэхэм ащ щафэгушIуагъэх.
ЗэIукIэгъум хэлажьэхэрэм шIуфэс къарихызэ федеральнэ инспектор шъхьаIэу Сергей Дрокиным къыIуагъ Фондым хэтхэм чанэу ыкIи шIуагъэ къытэу Iоф зэрашIэрэм пае зэрафэразэр. Народнэ фронтым ипроектэу «ЗэкIэ ТекIоныгъэм пай» зыфиIорэм Урысыем ипэрыт кIуачIэхэр зэрипхыгъэх, хэушъхьафыкIыгъэ дзэ операцием хэлэжьэрэ къулыкъушIэхэм ыкIи Донбасс щыпсэухэрэм IэпыIэгъушхо ятыгъэным иамал ащ къытыгъ.
«Мы лъэныкъомкIэ республикэм Iофтхьабзэу щызэрахьагъэхэм Адыгеим и ЛIышъхьэу КъумпIыл Мурат ренэу ынаIэ атыригъэтыгъ. Мызэу, мытIоу республикэм ипащэ тигъусэу е ежь пшъэрылъ зэрафишIыгъэм тетэу дзэ частым тыкIощтыгъ, мобилизацием къыхиубытагъэхэм яухьазырын зэрэкIорэм зыщыдгъэгъуазэщтыгъ. Пшъэрылъхэм ягъэцэкIэнкIэ ыкIи ахэм ящыкIагъэхэмкIэ шIэгъэн фаехэр итхъухьэщтыгъэх», — къыIуагъ Сергей Дрокиным.
ГъэцэкIэкIо хабзэм икъулыкъухэу, муниципалитетхэм япащэхэу ыкIи депутатхэу дзэкъулыкъушIэхэм яунагъохэм IэпыIэгъу язытыхэрэм Iофэу ашIагъэр шъхьафэу къыхагъэщыгъ. Анахьэу зыфэразэхэу зигугъу ашIыгъэхэр республикэм ибизнес-сообщесвэ илIыкIохэу зыкъэухъумэжьыгъэнымкIэ псэуалъэхэм яшIын пэIухьащт псэолъапхъэхэр аIэкIэгъэхьэгъэнхэм анахь чанэу хэлэжьагъэхэр ары.
Фондэу «ЗэкIэ ТекIоныгъэм пай» зыфиIорэм ишъолъыр къутамэ иIофшIэн илъэныкъохэм афэгъэхьыгъэу къаIотагъ АР-м и ЛIышъхьэрэ АР-м иминистрэхэм я Кабинетрэ я Администрацие ипащэу Владимир Свеженецрэ Народнэ фронтым ишъолъыр штаб ипащэу Юрий Гороховымрэ.
ГущыIэм пае, ахэм къыхагъэщыгъ илъэсэу икIыгъэм хэушъхьафыкIыгъэ дзэ операцием ифэныкъоныгъэхэм апае Адыгеим шIушIэ хьылъэ тонн 50-м ехъу зэрэщызэрагъэуIугъагъэр ыкIи автомобилэу «Нивэр» зэраратыгъагъэр. Ащ нэмыкIэу сомэ миллиони 8-м ехъу къаугъоигъагъ, ащ щыщэу миллиони 7-р республикэ шIушIэ марафоным къыщаугъоигъэр ары. Ахъщэм ызыныкъом нахьыбэр дзэ-техникэ оборудованием ыкIи Хъ. Андырхъуаем ыцIэкIэ щыт я 3-рэ артиллерийскэ дивизионэу Адыгеим икIыгъэхэм къулыкъур зыщахьырэм хэтхэм ящыкIэгъэщт шъуашэхэм апэIуагъэхьагъ.
Ащ нэмыкIэу къызэрэхагъэщыгъэмкIэ, хэушъхьафыкIыгъэ дзэ операцием хэлажьэхэрэм афагъэхьыгъэ посылкэхэмкIэ яшIуагъэ къэкIуагъ республикэм икIэлэцIыкIу IыгъыпIэхэмрэ иеджапIэхэмрэ. Ны-тыхэм, кIэлэегъаджэхэм пкъыгъо зэфэшъхьафхэу ахэм къашъхьапэщтхэр къахьыщтыгъэх, кIэлэцIыкIухэм дзэкъулыкъушIэхэм письмэхэр афатхыщтыгъэх, хэгъэгум иухъумакIохэм текIоныгъэр псынкIэу къыдахынэу афэлъаIощтыгъэх.
Iофтхьабзэм икIэухым Сергей Дрокиным Фондэу «ЗэкIэ ТекIоныгъэм пай» зыфиIорэм изэхэщэн анахьэу зиIахьышхо хэзышIыхьэгъэ IофышIэ купхэм Народнэ фронтым ирэзэныгъэ тхылъхэр аритыжьыгъэх. ХьыкумышI приставхэм, Росреестрэм, Роспотребнадзорым я ГъэIорышIапIэхэу АР-м щыIэхэм яIофышIэхэр хагъэунэфыкIыгъэх.
Адыгэ Республикэм и ЛIышъхьэу КъумпIыл Мурат ыцIэкIэ федеральнэ инспектор шъхьаIэу Сергей Дрокиным Фондэу «ЗэкIэ ТекIоныгъэм пай» зыфиIорэм иIофшIэн зиIахьышIу хэзышIыхьэгъэ пстэуми зэрафэразэр джыри зэ къыIуагъ.
Адыгэ Республикэм и ЛIышъхьэ ипресс-къулыкъу