Непэ зэрэдунаеу паркхэм я Мафэ щыхагъэунэфыкIыгъ. Тэри Мыекъуапэ изыгъэпсэфыпIэ шъхьаIэу сыд фэдэрэ лъэхъани ащ ыпсэу щытым тыщыIагъ, ащ ипащэу Дэхъумэ Батырбый Борис ыкъом аужырэ лъэхъаным ар зэрагъэкIэжьырэр, Iофыгъо инэу щызэшIуахыгъэхэр, тапэкIэ зылъыIэсыщтхэр къедгъэIотагъэх.
— Урысыем и Къыблэ щыIэхэм анахь уцышъоу ыкIи анахь дахэу алъытэхэрэм типарк ащыщ. Джыри нахь зэтебгъэпсыхьанэу, цIыкIуи ини кIуапIэ афэхъуным уишъыпкъэу узэрэдэлажьэрэр тэшIэ. Паркым нахьышIум ылъэныкъокIэ зызэрэзэблихъурэр хэти непэ инэрылъэгъу. Мы лъэхъаным шъуиIофхэр зэрэлъыкIуатэхэрэр къытфэпIотагъэмэ дэгъугъэ.
— Паркым идэхьагъу дэжь щытыгъэ чъыгыжъхэр рядгъэупкIыхи, кIэхэр дгъэтIысхьагъэх. Театрэмрэ паркымрэ азыфагу дэтыгъэ чэу шIыхьагъэр Iутхыжьыгъ. Паркым къыщыкIырэ пстэуми псыр зэрагъотынэу псырыкIопIэ системэ чIычIэгъым щызэбгырытщыгъ.
ПлиткэкIэ пкIэгъэ лъэсрыкIо гъогухэм якIыхьагъэ хэдгъэхъуагъ, ахэм тетIысхьапIэхэр ащыдгъэуцугъэх. Адыгеим и ЛIышъхьэу КъумпIыл Мурат къытфишIыгъэ унашъом тетэу ахэм япчъагъэ джыри хэдгъэхъощт.
Паркым къыщынэфырэ остыгъэхэр зэкIэ зэблэтхъугъэх, ахэр 400 фэдиз мэхъух, видеолъыплъэныр дгъэпсыгъ. Псыхъоу Шъхьэгуащэ инэпкъхэр къэпшIэжьыщтхэп, километри 2,5-рэ фэдиз икIэрыкIэу агъэпытагъ. БгъуитIуми лъэсрыкIо гъогухэр ащагъэпсыгъэх, тетIысхьапIэхэр ащагъэуцугъэх. Нэпкъым зыплъыхьэпIэ чIыпIэхэр щашIыгъэх, ахэм джыри ахэдгъэхъощт.
— Батырбый, паркым дэт аттракционхэр зэблэхъугъэным иIофыгъо къэуцурэба?
— Ащ тегъэгумэкIы ыкIи тыдэмылажьэу щытэп. Илъэс зытIукIэ аттракционыкIэхэр къэтщэфынхэу тэгугъэ. ТиIэпыIэгъухэр Адыгэ Республикэм и ЛIышъхьэу КъумпIыл Муратрэ Мыекъопэ къэлэ администрацием ипащэхэмрэ. Ахэм лъэшэу яшIуагъэ къытагъэкIы.
— Урамэу Гагариным ыцIэ зыхьырэм ылъэныкъокIэ щагъэпсыгъэ аллеем паркыр къыгъэдэхагъ. ЯтIонэрэ дэхьапIэу ащ къыпэблагъэм фэгъэзэгъэ чIыгум псэолъакIэ-
хэр тырашIыхьащтха?
— Шахмат зыщешIэхэрэ ыкIи зэнэкъокъухэр зыщызэхащэхэрэ унэр агъэкIэжьынэу щыт. Ащ ыкIыбкIэ дэт чъыг лъэгэшхохэм къатырэ жьаум гъэмафэрэ зыщыбгъэпсэфыныр тхъагъо. ТетIысхьэпIэ заулэ щыдгъэуцумэ, зыныбжь хэкIотагъэхэм лъэшэу къашъхьапэщт.
— Аужырэ илъэсхэм бассейным Iоф зэримышIэжьырэр къэлэдэсхэм агу къео. Сыдигъуа псыр къызырагъэхъожьыщтыр, ар къызызэIуахыжьыщтыр?
— Ар Iофыгъо инэу тапэ илъ. Бассейныр зэрэщытэу зэпкъырахыжьынышъ, икIэрыкIэу агъэпсыжьынэу ары зэрэщытыр. Пащэхэри ащ пылъых, IэпыIэгъум тежэ.
— Батырбый, паркым иIофыгъохэр нахь зэрэкIэкIынхэу къызIэкIэбгъахьэ пшIоигъохэр сыда?
— Ар сыдигъуи гъэкъэбзэгъэным фэшI ГАЗель, мотороллер, шIоир зыугъоирэ пкъыгъор, лъэныкъуабэм афытегъэпсыхьэгъэ трактор тищыкIагъэх. Тэр-тэрэу паркым дэт псэуалъэхэр дгъэкIэжьыгъэх. «Кривое зеркало» зыфиIорэ унэр шIэхэу къызэIутхыжьыщт, апчхэр къэтщэфыгъахэх.
— Паркхэм я Мафэ фэгъэхьыгъэу уиIофшIэгъухэм сыда япIомэ пшIоигъор?
— Нэбгырэ 70-рэ фэдиз тэхъу. Сафэразэу зэкIэми сафэгушIо. ТызэгурыIоу тызэхэт, тызэдэлажьэ, зэкIэми тхьашъуегъэпсэу ясэIо.
ДэгущыIагъэр Шъаукъо Аслъангуащ.
Сурэтхэр: А. Балабась.