ЖъоныгъуакIэм и 23-м Адыгеим ошъушхо къызэрэщехыгъэм къыхэкIэу Мыекъопэ районым ит псэупIэхэу Шэнтыкъо, Цветочнэм, Подгорнэм ыкIи Тимирязевам адэт унэе псэупIэхэу нэбгырэ 30 фэдиз зэрысхэм иягъэ аригъэкIыгъ.
АР-м граждан зыкъэухъумэжьынымкIэ ыкIи ошIэ-дэмышIэ IофхэмкIэ и Комитет къызэрэщаIуагъэмкIэ, ошъушхоу къехыгъэм къыхэкIэу Мыекъопэ районым щыпсэурэ зы нэбгырэм шъобжхэр тещагъэхэ хъугъэ, автомобилитIу ыгъэфыкъуагъ. Мэкъумэщ лэжьыгъэхэми иягъэ аригъэкIыгъ, ар зэрэхъурэ гектар пчъагъэр джырэ уахътэм агъэунэфы. Нэбгырэ 30 зыщыпсэурэ (8-р кIэлэцIыкIух) уни 8-мэ щыIэкIэ амалэу яIэр зэщыкъуагъэ хъугъэ.
Мыщ ыпэкIэ синоптикхэм къатыгъэу щытыгъ ом изытет къызэрэзэIыхьащтыр, миллиметрэ 20 иинагъэу ошъу къехын зэрилъэкIыщтыр.
Нахьыбэу ошъум зиягъэ ригъэкIыгъэр Тимирязевскэ къоджэ псэупIэр ары. Къоджэдэсхэм мылъку чIэнагъэу аригъэшIыгъэр къалъытэ.
Адыгеим игидрометеогупчэ къызэритыгъэмкIэ, жъоныгъуакIэм и 24 — 25-м ошъу хэтэу ощхышхо къещхыщт, жьыбгъэр лъэшэу къепщэщт.
Непи республикэм икъэлэ шъхьаIэрэ Мыекъопэ районымрэ ошъу къащехыгъ. Ыгъэфыкъуагъэ щыIэмэ шъущыдгъэгъозэщт.