Шэуджэн районым щызэхэщэгъэ ижъырэ адыгэ орэд къэIонымкIэ лъэпкъ ансамблэу «Джэныкъом» творческэ купхэм я Урысые фестиваль-зэнэкъокъоу Астрахань щыкIуагъэм текIоныгъэр къыщыдихыгъ ыкIи миллионитIу хъурэ грант IэпыIэгъур къыфагъэшъошагъ.
Лъэпкъ проектэу «Культурэр» зыфиIорэм къыдыхэлъытэгъэ Iофтхьабзэхэм ахэтэу зэнэкъокъур зэхащэгъагъ. Урысыем икуп 300 фэдиз ащ хэлэжьагъ. Куп 20-мэ грант IэпыIэгъур къырахыгъ. «Джэныкъор» зыхэлэжьэгъэ едзыгъоу Астрахань щыкIуагъэм Къыблэ ыкIи Темыр-Кавказ федеральнэ шъолъырхэм, Донецкэ, Луганскэ, Запорожскэ ыкIи Херсон хэкум, Донбасс къарыкIыгъэ творческэ куп 11 хэлэжьагъ. Ахэр апэрэ хэшыпыкIын едзыгъоу чIыпIэхэм ащыкIуагъэхэм ащыпхырыкIыгъэхэр арых. Ижъырэ орэд къэIонымкIэ лъэпкъ ансамблэу «Джэныкъом» ипащэу Юсып Заур къызэрэтиIуагъэмкIэ, ятIонэрэ едзыгъом куп 11 щызэнэкъокъугъ ыкIи грант IэпыIэгъур ежьхэм анэмыкIэу джыри купитIум къырахыгъ, ахэр — къэзэкъ орэд къэIонымкIэ Ростов хэкум иансамблэу «Вольница» ыкIи Дагъыстан къикIыгъэ даргин ансамблэу «Гергебиль».
ОрэдыIо купэу «Джэныкъор» 2014-рэ илъэсым зэхащагъ. Илъэсибгъум фестиваль, зэнэкъокъу зэфэшъхьафхэм ахэлэжьэнэу хъугъэ, гъэхъагъэу ышIыгъэхэм яшыхьатэу 2018-рэ илъэсым «народнэ» цIэр къыфагъэшъошагъ. Ижъырэ адыгэ орэдхэр пэсэрэ шапхъэмэ адиштэу къаIоныр купым хэтхэм пшъэрылъ шъхьаIэу зыфагъэуцужьы. Адыгэ музыкальнэ Iэмэ-псымэхэу къамылыр, шыкIэпщынэр агъэфедэх.
«Куп пэпчъ такъикъ пшIырыпшI фагъэнэфагъ, а уахътэм ублэкIы хъунэу щытыгъэп, уасэу къыпфашIыщтымкIэ ащи мэхьанэ иIагъ, — фестивалым ишапхъэхэм къатегущыIагъ Юсып Заур. — ХьакIэщ орэдкIэ тыубли, «Оз Мурат» шыкIэпщынэр, жъыур хэтэу къэтIуагъ, нэужым адыгэ мэкъэмэ зэхэтхэр къафедгъэIуагъэх, «Шъэощэжь орэдыр» ащ къыкIэлъыкIуагъ, кIэухым пщынэ мэкъамэхэм жъыур кIэкIэтэу ядгъэдэIугъэх. Адыгэ музыкальнэ Iэмэ-псымэ зэфэшъхьафхэр зэрэдгъэфедэхэрэр ядгъэлъэгъунэу тыфэягъ».
«Джэныкъом» хэтхэу фестиваль-зэнэкъокъум хэлэжьагъэхэр Юсып Заур (Хьакурынэхьабл), Быщтэкъо Адам (Пщыжъхьабл), Мерэм Аскэрбый (Джыракъый), ПашIо Айдэмыр (Хьакурынэхьабл), Тутарыщ Заурбый (Мамхыгъ).
«АР-м культурэмкIэ и Министерствэ иавтобускIэ фестивалым тыкIуагъ. Тишъуашэхэр шъой-цый хъугъэхэти, ащ тыкIон зэхъум Къэралыгъо академическэ къэшъокIо ансамблэу «Налмэсым» ихудожественнэ пащэу Хъоджэе Аслъан зыфэдгъэзагъ ыкIи ар шъуашэхэмкIэ IэпыIэгъу къытфэхъугъ. Лъэшэу тыфэраз! Джащ фэдэу Магас тыкIон зэхъуми ар къыддеIэгъагъ. СыдигъокIи «хьаIу» къытиIорэп. Аслъан фестивалым иосэшI куп хэтыгъ. Джащ фэдэу уасэ къытфэзышIыгъэхэм ахэтыгъэх, гущыIэм пае, лъэпкъ творчествэм икъэралыгъо Унэу В. Поленовым ыцIэ зыхьырэм ипащэу Тамара Крутовар, орэдыIо-къэшъокIо купэу «Русь» зыфиIоу М. Фирсовым ыцIэ зыхьырэм ипащэу Эдуард Ахметовыр, осэшI купым итхьамэтагъэр Урысые академиеу Гнесинхэм ацIэ зыхьырэм ипрофессорэу, Урысыем икомпозиторхэм я Союз хэтэу Александр Цыганковыр ары. Мыщ фэдэ цIыф цIэрыIохэм, профессионалхэм уасэ къызэрэтфашIыгъэм тигъэгушхуагъ, тиIэтыгъ», — еIо Заур.
Лъэпкъ творчествэм ифестиваль-зэнэкъокъоу Астрахань щыкIуагъэм ипрограммэ къыдыхэлъытэгъэ конференцием хэлэжьагъэх АР-м культурэмкIэ иминистрэ игуадзэу Кушъу Светланэрэ АР-м
Лъэпкъ культурэмкIэ и Гупчэ итхьаматэ игуадзэу Анцокъо Фатимэрэ. Джащ фэдэу Адыгеим икультурэ илIыкIохэр зэгъусэхэу мы Iофтхьабзэм хэлэжьагъэх.
«ТыкъэзытIупщыгъэхэри лъэшэу къытфэгумэкIыгъэх, — хегъэунэфыкIы Юсып Заур. — Шэуджэн районым культурэмкIэ и ГъэIорышIапIэ ипащэу Къэрэбэт Айдэмыр, районымкIэ Лъэпкъ культурэм и Гупчэ ипащэу Боджэкъо Заурбый зэрафэлъэкIэу анаIэ къыттетыгъ, музыкальнэ Iэмэ-псымэхэмкIи, нэмыкI фэныкъуагъэу тиIэхэмкIи къыддеIагъэх. Тэ тшъхьэ закъоу е Шэуджэн район къодыеу щымытэу зэрэ Адыгееу тырилIыкIоу фестивалым тыхэлэжьагъ, ижъырэ адыгэ орэдыжъхэр щыдгъэIугъэх, тикультурэ лъагэу зэрэтIэтыщтым, къызэрэдгъэлъэгъощтым тыпылъыгъ».
Фестиваль-зэнэкъокъум и Гала-концертэу чъэпыогъум Москва щыкIощтым ижъырэ адыгэ орэд къэIонымкIэ лъэпкъ ансамблэу «Джэныкъор» рагъэблэгъагъ. Ащ нэсыфэ грант IэпыIэгъум ишIуагъэкIэ купым хэтхэм нахь зызэтырагъэпсыхьащт. Юсып Заур къызэриIуагъэмкIэ, шъуашэхэр, адыгэ музыкальнэ Iэмэ-псымэхэр — пщынэбитIу-щы зиIэ шыкIэпщынэхэр, микрофонхэр къызIэкIагъэхьан ямурад.
Тэу Замир.
Сурэтхэр: «Джэныкъом» ихъарзынэщ.