«Сыдэущтэу угукIэ узыфэщэгъэ сэнэхьатыр пIэ къибгъэхьан плъэкIыщта, уищыIэныгъэ гъогу ар сыдэущтэу еппхыщта ыкIи Iофэу узыпылъым сыдэущтэу хэбгъэхъощта?» зыфэпIощт упчIэхэм яджэуапхэр Адыгеим икIэлэеджакIохэмрэ студентхэмрэ къызIэкIагъэхьан амал яIагъ.
Урысые обществэу «ШIэныгъ» зыфиIорэр изэхэщакIоу «ШIэныгъ. Гъэхъагъ» зыфиIорэ узыгъэгъозэрэ ныбжьыкIэ форумэу Мыекъопэ къэралыгъо технологическэ университетым щыкIуагъэм ахэр хэлэжьагъэх.
IофшIэпIэ чIыпIэ ягъэгъотыгъэнымкIэ Урысыем ишъолъыр зэфэшъхьафхэм къарыкIыгъэхэ экспертхэр ыкIи тиреспубликэкIэ IофшIэн языгъэгъотыхэрэм ащыщхэр Адыгеим иныбжьыкIэхэм аIукIагъэх, лекциехэм къафяджагъэх, мастер-классхэр къагъэлъэгъуагъэх, зэдэгущыIэгъухэр адашIыгъэх.
Iофтхьабзэм хэлэжьагъэх Урысые обществэу «ШIэныгъ» зыфиIорэм и Адыгэ шъолъыр къутамэ итхьаматэу, университетым иректорэу Къуижъ Саидэ, АР-м гъэсэныгъэмрэ шIэныгъэмрэкIэ иминистрэ ипшъэрылъхэр зыгъэцэкIэрэ Евгений Лебедевыр, Мыекъопэ къэлэ администрацием ипащэ иапэрэ гуадзэу Сергей Стельмах, АР-м ныбжьыкIэ IофхэмкIэ и Комитет итхьаматэу Максим Галушкиныр, цIыфхэм IофшIапIэ ягъэгъотыгъэнымкIэ федеральнэ къулыкъум и ГъэIорышIапIэу АР-м щыIэм ипащэу Галина Цыганковар, АР-м ипромышленникхэм ыкIи ипредпринимательхэм я Союз итхьаматэу НатIэкъо Мурат, нэмыкIхэри.
Форумым хэлажьэхэрэм шIуфэс гущыIэмкIэ закъыфигъэзагъ Е. Лебедевым. Ащ къызэриIуагъэмкIэ, ныбжьыкIэхэм шIэныгъэу яIэр, ясэнаущыгъэ къагъэлъэгъоныр, ягухэлъхэр пхыращышъунхэм афэгъэсэгъэнхэр, IофшIэпIэ чIыпIэхэр къэзытырэ компаниехэм, хъызмэтшIапIэхэм япащэхэм нэIуасэ афэшIыгъэнхэр, ахэм кадрэхэмкIэ IэпэчIэгъанэ ашIыщтхэр къыхягъэхыгъэнхэр ары пшъэрылъ шъхьаIэу Iофтхьабзэм иIэр.
— Урысые обществэу «ШIэныгъэм» тыфэраз, ныбжьыкIэхэм ягъэсэныгъэ хагъэхъонымкIэ, аужырэ шапхъэхэм адиштэрэ технологиехэмкIэ Iоф ашIэнымкIэ иIахьышIу хэлъ. Форумыр Адыгеим зэрэщыкIорэм шIуагъэ къызэритыщтым щэч хэлъэп, — къыIуагъ Е. Лебедевым.
Форумым икъызэIухын фэгъэхьыгъэ зэхахьэм хэлэжьагъ ыкIи Мыекъопэ къэралыгъо технологическэ университетым ыцIэкIэ къэзэрэугъоигъэхэм шIуфэс къарихыгъ ныбжьыкIэ политикэмкIэ проректорэу БрантI Мурат. НыбжьыкIэхэм сэнэхьатэу къыхахыгъэмкIэ IофшIэпIэ чIыпIэ агъотыныр, яшIэныгъэ щагъэфедэжьышъуныр, ясэнэхьаткIэ лъыкIотэнхэр непэ Iоф псынкIэу зэрэщымытыр, ащкIэ IэпыIэгъу къафэхъун зылъэкIыщт форумым изэхэщэн мэхьэнэшхо зэриIэр ащ къыхигъэщыгъ. АщкIэ Мыекъопэ къэралыгъо технологическэ университетыр площадкэу къызэрэхахыгъэр зэрягуапэр къыкIигъэтхъызэ, шIуагъэ къытэу яIофшIэн лъагъэкIотэнэу къафэлъэIуагъ.
Форумым ипрограммэ едзыгъуищэу гощыгъагъ: «Хэхъоныгъэр», «Карьерэр», «Бизнесыр ыкIи егъэжьапIэр». КIэлэеджакIо ыкIи студент пэпчъ ежь зыфэе лъэныкъор къыхихын амал иIагъ. Ахэр лекциехэм ядэIугъэх, IофшIэпIэ чIыпIэ къэзытыхэрэм, предпринимательхэм дискуссиехэр адашIыгъэх, мастерклассхэр къафагъэлъэгъуагъэх. Джащ фэдэу IофшIапIэ Iухьанхэм пае амалэу яIэхэр къызщагъэлъэгъорэ тхылъыр (резюме) тэрэзэу зэхагъэуцоным фагъэсагъэх, пэшIорыгъэшъ зэдэгущыIэгъухэр къадашIыгъэх.
Форумым испикерыгъэх ныбжьыкIэ политикэм иIофышIэ гъэшIуагъэу, тренингымкIэ агентствэ зэхэзыщагъэу ыкIи тхылъ тедзапIэу «Феникс» тхылъ къыщыдэзыгъэкIыгъэу Виктория Литвиновар, IТ-компанием ыкIи егъэджэн гупчэу «ИВЦ 8 бит» зыфиIорэм ягенеральнэ пащэу Вадим Твердохлеб, «НыбжьыкIэхэм я Ун», IэпыIэгъу зэфэхъугъэнымкIэ штабэу «Тызэгъус» зыфиIорэм ишъолъыр координаторэу Надежда Кикоть ыкIи ащ иIофшIэгъоу Ксения Курята.
— Республикэу Къырым сыкъикIыгъ, ныбжьыкIэхэм Iоф адэшIэгъэнымкIэ мысатыу организациеу «НыбжьыкIэхэм я Ун» зыфиIорэм икоординаторэу Iоф сэшIэ. Мы Iофтхьабзэм апэрэу сыхэлажьэ ыкIи сицыхьэ телъ ащ ишIогъэшхо къызэрэсэкIыщтым. АпэрапшIэ шъолъыр зэфэшъхьафхэм къарыкIыгъэ ныбжьыкIэхэр IэпэIэсэныгъэу аIэкIэлъымкIэ зэхъожьыгъэх. Тиреспубликэ Iофтхьабзэу щызэхатщэхэрэм ащыдгъэгъозагъэх, гуфитхэм яресурс гупчэ къызэIутхыгъэу ащ зызэредгъэушъомбгъущтым тыпылъ. НыбжьыкIэ политикэм хэхъоныгъэ ышIынымкIэ Мыекъуапэ щыщхэми Iофэу ашIэрэм зыщыдгъэгъозагъ, — къыIуагъ Н. Кикоть.
— Адыгеир, анахьэу Мыекъуапэ сыгу рехьы, ущыпсэункIэ хъопсапIэу щыт, — къыIуагъ Псыфабэ къикIыгъэ спикерэу Вадим Твердохлеб. — Урысые обществэу «ШIэныгъэм» сыхэтэу илъэсищ хъугъэу мыщ фэдэ форумхэм, зэIукIэхэм сахэлажьэ. Тинепэрэ лъэхъан IТ-технологием чIыпIэ гъэнэфагъэ зэрэщиубытыгъэм, ащ епхыгъэ екIолIакIэу щыIэхэм студентхэр ащызгъэгъозагъэх. Джыдэдэм мы лъэныкъом мэхьанэшхо раты хъугъэ ыкIи ныбжьыкIэхэм ясэнэхьаткIэ Iоф ашIэнымкIэ ар къягоонэу бэхэр егупшысэх. Ар арэущтэу зэрэщымытыр ныбжьыкIэхэм къафэсIотагъ. Ащ нэмыкIэу бизнесыр зышIогъэшIэгъонхэм апэрэ лъэбэкъоу ашIын алъэкIыщтхэм ащызгъэгъозагъэх.
КIАРЭ Фатим.