Хабзэ зэрэхъугъэу, илъэс къэс гуманитар ушэтынхэмкIэ Адыгэ республикэ институтэу Т. КIэращэм ыцIэ зыхьырэм научнэ еджэнхэу славян тхыбзэм ыкIи культурэм афэгъэхьыгъэхэр щызэхащэх.
Славян просветительхэу Кириллрэ Мефодийрэ мы лъэныкъомкIэ Iофышхо алэжьыгъ. Ежь мэфэкIыри лъэныкъуабэу ыкIи мэхьанэ зиIэу гъэпсыгъэ, Урысыем ар игъэкIотыгъэу щыхагъэунэфыкIы. Илъэс 16 хъугъэу мы Iофтхьэбзэ иныр зэхащэ славян-адыгэ культурэ зэпхыныгъэхэмкIэ институтым иотдел инаучнэ IофышIэхэм. Непэрэ научнэ еджэнхэм дунэе мэхьанэ яIэ хъугъэ.
Отделым ипащэу Г. Б. Луганскаям къызэриIуагъэмкIэ, мурадэу яIэр славян-адыгэ зэпхыныгъэмкIэ IофшIэгъэ опытэу яIэр зэхэфыгъэныр, тарихъ уасэу иIэр гъэунэфыгъэныр, славян ыкIи адыгэ лъэпкъхэм язэдэIорышIакIэ тарихъ-культурэ лъэныкъомкIэ гъэунэфыгъэныр, Урысыем, IэкIыб къэрал благъэхэм ыкIи чыжьэхэм ащыпсэурэ цIыф лъэпкъхэр культурэ зэдэгущыIэгъумкIэ зэпхыгъэнхэр ары.
Зэпэчыжьэ шIыкIэм тетэу научнэ-ушэтэкIо институтхэм ыкIи гупчэхэм яIофышIэхэр — тарихълэжьхэр, этнографхэр, культурологхэр, филологхэр, фольклористхэр, искусствоведхэр, краеведхэр, музейхэм ыкIи тхылъеджапIэхэм яIофышIэхэр, гурыт сэнэхьат ыкIи апшъэрэ гъэсэныгъэ зыщарагъэгъотырэ еджапIэхэм якIэлэегъаджэхэр зэдэгущыIэщтых, гупшысэгъу зэфэхъущтых. Зигъо шIэныгъэ Iофтхьабзэм Адыгеир, Къэрэщэе-Щэрджэсыр, Краснодар ыкIи Ставрополь крайхэр, Башкортостан, Республикэу Беларусь, Армениер, Азербайджан хэлажьэх.
Еджэнхэм доклад 50 фэдизым ащытегущыIэщтых, ахэм яавторхэр зэлъашIэрэ шIэныгъэлэжьхэр ыкIи наукэм хэуцорэ ныбжьыкIэ ушэтакIохэу АКъУ-м ыкIи КъБУ-м яаспирантхэр, магистрантхэр Краснодар культурэмкIэ икъэралыгъо институт, мыхэм анэмыкIхэри. КъиIотыкIынхэм ыкIи докладхэм темэ зэфэшъхьафыбэ къащаIэтыгъ, ахэр мэхьанэшхо зиIэ закIэх. Непэ я XVI-рэ Дунэе научнэ Iофтхьабзэу гуманитар ушэтынхэмкIэ Адыгэ республикэ институтэу Т. КIэращэм ыцIэ зыхьырэм щыкIорэр шIэныгъэ гупшысэ икъухэр зыхэлъэу зэрэщытым уеджэнджэшынэу щытэп.
ШIэныгъэ еджэнхэр зэрэкIуагъэхэмкIэ зэфэхьысыжьхэр ашIыщтых ыкIи статьяхэр зэкIэ зыдэт тхылъ къыдагъэкIыщт.
Мамырыкъо Нуриет.