Кушъхьэфэчъэ спортымкIэ Урысыем ипервенствэу къалэу Ижевскэ щыкIуагъэм Адыгеим щыщ Таисия Чуренковам ящэнэрэ чIыпIэр къыщыдихыгъ. Ар спортымкIэ мастер, шъхьэзэкъо зэнэкъокъухэм къадыхэлъытагъэу километрэ 25-рэ хъурэ гъогууанэр псынкIэу къэзычъыгъэхэм ащыщ хъугъэ.
Урысыем ишъолъыри 10-мэ къарыкIыгъэ спортсменкэхэм типшъэшъэ ныбжьыкIэр янэкъокъугъ. Ахэм ахэтыгъэх спортымкIэ мастер 12 ыкIи кандидати 7. Жьы щымыIэу, температурэр градус 18-м кIахьэу Iофтхьабзэр кIуагъэ. Адыгеим илIыкIо икъэгъэлъэгъон такъикъ 38-м тIэкIу ехъу. Я 4-рэ чIыпIэр къыдэзыхыгъэ Анастасия Печерских (Санкт-Петербург) икъэгъэлъэгъон егъэпшагъэмэ ар зы нэгъэупIэпIэгъукIэ нахь псынкI. ЯтIонэрэ чIыпIэр къыдихыгъ Самарскэ хэкур къэзыгъэлъэгъогъэ Дарья Фоминам. ТекIоныгъэр зыфагъэшъошагъэр Иркутскэ хэкум щыщ Дарья Бунеевар ары.
Адыгеим испортсменкэ ыкIи ащ итренерэу Алексей Войновым тафэгушIо, тапэкIи гъэхъэгъэшIухэр ашIынхэу афэтэIо.