Адыгеимрэ Краснодар краимрэ ащыпсэурэ цIыфхэм транспортым ылъэныкъокIэ яфэIо-фашIэхэр нахь дэгъоу гъэцэкIэгъэнхэм пае мэкъуогъум и 1-м къыщегъэжьагъэу мэшIокоу N 814-р Шъачэ къикIызэ Мыекъуапэ къакIозэ ышIыщт.
МэшIоку зэтегъэпсыхьагъэхэу купэу «ЛасточкэкIэ» заджэхэрэм ащыщ а гъогум тетыщтыр.
Мафэ къэс цIыфхэм мэшIокукIэу агъэнэфагъэмкIэ гъогу техьанхэ алъэкIыщт. Станциеу «Аэропортэу Шъачэ» мафэ къэс пчэдыжьым сыхьатыр 6.41-м ар къыIукIынышъ, Мыекъуапэ сыхьатыр 12.41-м къэсыщт. Адыгеим икъэлэ шъхьаIэ сыхьатыр 16.10-м мэшIокур дэкIыщт, кIэух станцием сыхьатыр 12.10-м нэсыщт.
МэшIокум къэуцупIэ заулэ ышIыщт, ахэр станциехэу Адлер, Хостэ, Шъачэ, Тыгъэмыпс, Лэу, ПсышIуапэ, Щыпсы, ТIуапсэ, Хъыдыжъ ыкIи Шытхьалэ.
Адыгеим икъэлэ шъхьаIэрэ хы ШIуцIэ Iушъомрэ зэзыпхыхэрэ ятIонэрэ мэфэ мэшIокоу хъущт Шъачэ къикIэу Мыекъуапэ къэ-сыщт мэшIокур. НепэкIэ республикэм щыпсэухэрэр «Мыекъуапэ — Имеретинскэ Курортыр» зыфиIорэ гъогумкIэ мэшIокоу N 834-м Шъачэ нигъэсынхэ ылъэкIыщт. Мыекъуапэ пчэдыжьым мэшIокур дэкIыщт, Имеретинскэ Курортым — пчыхьэм.
Шъугу къэтэгъэкIыжьы: чыжьэу кIорэ мэшIокухэу купэу «Ласточкэм» хахьэхэрэр Шъачэ екIыхэшъ непэкIэ станциехэу Анапэ, Новороссийскэ ыкIи Ростов анэсых. ЦIыфхэм а мэшIоку лъэпкъхэр агу рехьых, нахь зэлъашIэ хъугъэх.
ПэшIорыгъэшъэу билетхэр зыщэф зышIоигъохэми ащ фэдэ амал яIэ хъугъэ. ЧIыпIэхэр щыIэхэмэ ыкIи билетхэм ауасэ зыфэдизыр нахь игъэкIотыгъэу Iахьзэхэлъ обществэу «РЖД-м» иофициальнэ сайт щызэжъугъэшIэн шъулъэкIыщт.