Урысые Федерацием и Президент и УказкIэ Адыгеим урысыбзэмрэ литературэмрэкIэ икIэлэегъаджэу Мария Трофименкэм гъэсэныгъэм ылъэныкъокIэ ыкIи ныбжьыкIэхэр яхэгъэгу шIу алъэгъоу пIугъэнхэмкIэ гъэхъэгъэшхоу иIэхэм апае щытхъуцIэу «Урысые Федерацием изаслуженнэ кIэлэегъадж» зыфиIорэр къыфагъэшъошагъ.
Урысыем и Президентэу Владимир Путиным ар къыритыжьыгъ Урысые Федерацием иапшъэрэ икъэралыгъо тынхэр афэгъэшъошэгъэнхэм фэгъэхьыгъэ Iофтхьабзэу зэхащагъэм илъэхъан. Непэ Кремлым хэт Екатериненскэ залым ар къыщыратыжьыгъ.
Къэралыгъом ипащэ Мария Трофименкэм къылэжьыгъэ цIэ лъапIэм пае къыфэгушIуагъ ыкIи тапэкIи гъэхъагъэхэр ышIынхэу фиIуагъ.
«ПIуныгъэ-гъэсэныгъэр пшъэрылъ къызэрыкIоу щытэп, анахьэу етIани къыткIэхъухьэхэрэм афэгъэхьыгъэу угущыIэн хъумэ. МыщкIэ еджапIэмрэ кIэлэегъаджэмрэ мэхьанэшхо яIэу щыт. Ахэм шIэныгъэм имызакъоу, цIыфыгъэ-шэпхъэ дахэхэри, цIыфым зекIокIэшэнэу нэужым хэлъыщтхэри халъхьэ. ЗикIэлэеджакIохэр «Урысыем и ЛIыхъужъ» хъугъэ кIэлэегъаджэхэм лъытэныгъэ ин афысиIэу тын лъапIэхэр непэ аIэкIэсэгъэхьажьых», — къыIуагъ Владимир Путиным.
Трофименко Мария Николай ыпхъум 1971-рэ илъэсым Адыгэ къэралыгъо кIэлэегъэджэ институтыр къыухыгъ, урысыбзэмрэ литературэмрэкIэ кIэлэегъэджэ сэнэхьатыр иIэ хъугъэ. Еджэныр къызэриухыгъэм лъыпытэу IофшIэныр ригъэжьагъ. РеспубликэмкIэ, анахьэу етIани ежь зыIут мыекъопэ гимназиеу N 22-м щылэжьэрэ кIэлэегъаджэхэу анахь гуетыныгъэ хэлъэу зипшъэрылъ зыгъэцакIэхэрэм ар ащыщ. 1975-рэ илъэсым къыщыублагъэу непэ къызынэсыгъэм Мария Трофименкэм мы организацием Iоф щешIэ. Мыекъуапэ щыщхэу, нэужым IофышIэ IэпэIасэхэу, хэгъэгум ицIыф шIагъохэу хъугъэхэм ащыщыбэхэр ащ ригъэджагъэх ыкIи ыпIугъэх. Ахэм зыкIэ ащыщ Урысые Федерацием и ЛIыхъужъэу, Адыгэ Республикэм и Къэралыгъо Совет — Хасэм и Тхьаматэ игуадзэу Цэй Эдуард.
Адыгеим и ЛIышъхьэу КъумпIыл Мурат къызэриIуагъэмкIэ, Трофименко Марие Николай ыпхъум IэпэIэсэныгъэ ин хэлъ, гъэсэныгъэм ылъэныкъокIэ Адыгеим ищытхъу чыжьэу зыгъэIугъэ гъэхъагъэхэр ащ ышIыгъэх.
«Къэралыгъо щытхъуцIэу «Урысые Федерацием изаслуженнэ кIэлэегъадж» зыфиIорэр къызэрэфагъэшъошагъэм пае Мария Николай ыпхъум сыфэгушIо. Ар егъэджэн лъэныкъомкIэ Iоф зышIэхэрэм афагъэшъошэрэ анахь цIэ лъаIэу щыт. ИIофшIэнкIэ IэпэIэсэныгъэу хэлъым имызакъоу, икIэлэеджакIохэм гъэхъагъэу ашIыгъэхэри ащ къегъэлъагъо. Урысые лъэгапIэм тетэу тикIэлэегъаджэхэм гъэхъагъэу яIэхэр къызэрэхэдгъэщыхэрэм ишIуагъэ къэкIощт Президентым къыгъэуцугъэ пшъэрылъхэр гъэцэкIагъэ хъунхэмкIэ, лъэпкъ проектэу «Гъэсэныгъэр» пхырыщыгъэнымкIэ ыкIи кIэлэегъаджэм шъхьэкIэфэ-лъытэныгъэу фашIырэри ащ нахь къеIэты», — къыIуагъ Адыгеим и ЛIышъхьэу КъумпIыл Мурат.
АР-м и ЛIышъхьэ ипресс-къулыкъу