Гурыт еджапIэхэм непэ аужырэ одыджыныр къащытеуагъ.
Мыекъопэ гимназиеу Евгений Шварц ыцIэ зыхьырэм ащ фэгъэхьыгъэ мэфэкI Iофтхьабзэу щызэхащагъэм еджапIэр къэзыухыхэрэм хэушъхьафыкIыгъэ вальсым илъэтегъэуцо къыщашIыгъ.
ЕджапIэм ипчъэхэр зэIухыгъэу, зичэзыу илъэс еджэгъур къэзыухыгъэхэм гимназием мыгъэ къычIэкIыхэрэри ягъусэхэу сатырэу зэхэтыгъэх. Джыри ахэм къэралыгъо ушэтынхэр къапыщылъых, ау щытми, аужырэ одыджыныр ящыIэныгъэ изы едзыгъо зараухыгъэм ишыхьат.
Мыекъопэ гимназиеу N 5-м ипащэу Баслъынэй Саидэ мэфэкI зэхахьэр къызэIуихыгъ. КIэлэегъаджэхэм ацIэкIэ еджапIэр къэзыухыгъэхэм ар къафэгушIуагъ. Нэбгырэ 28-у гимназием къычIэкIыхэрэр гурыт еджапIэр къэзыухырэ ныбжьыкIэ пстэуми афэдэу щыIэныгъэ гъогум техьащтых. Нэбгырэ 52-мэ я 9-рэ ыкIи 68-мэ ублэпIэ классхэр гимназием мыгъэ къыщаухыгъэх. ЕджапIэм гъэсэныгъэмкIэ хахъоу ышIыгъэм шъхьаджи ыкIуачIэ зэрэхилъхьагъэр гимназием ипащэ хигъэунэфыкIыгъ ыкIи къычIэкIыхэрэм закъыфигъэзагъ:
«ЕджапIэр шъуигукъэкIыжь нэфхэм къазэрэхэнэщтым сицыхьэ телъ. Шъуапэ илъ къэралыгъо ушэтынхэр дэгъоу шъутынхэу шъуфэсэIо! ЩыIэныгъэ гъогу кIыхьэу шъуапэ илъым гъэшIэгъоныбэ щышъулъэгъущт. Сыд хъугъэми, шъуинасып къыхьырэр нахьыбэу, жъугъэнэфэрэ лъэгапIэхэм шъуанэсынэу, шъуигухэлъхэр къыжъудэхъунэу шъуфэсэIо!»
Мыекъопэ гимназиер къэзыухыхэрэм шъуфэс гущыIэхэмкIэ зафигъэзагъ АР-м культурэмкIэ иминистрэу Аулъэ Юрэ. АР-м и ЛIышъхьэрэ министрэхэм я Кабинетрэ ацIэкIэ кIэлэегъаджэхэми, кIэлэеджакIохэми, еджапIэм къычIэкIыхэрэми къафэгушIуагъ, ушэтынхэр зыпэ илъхэм ахэр IэшIэх афэхъунэу афиIуагъ.Къэралыгъо программэхэр къызфагъэфедэзэ еджапIэхэм гъэцэкIэжьынхэр зэращызэшIуахыхэрэм, кIэу къашIыхэрэм япчъагъэ зэрэхагъахъорэм министрэм ягугъу къышIыгъ. ЕджапIэр къэзыухыхэрэм къыхахыгъэ сэнэхьатхэмкIэ ящыкIэгъэ гъэсэныгъэр зэрагъэгъотынышъ, щыIэныгъэм пытэу хэуцонхэу афиIуагъ.
Мыекъопэ гимназиеу N 5-р шъолъыр мэхьанэ зиIэ культурнэ кIэным ипсэуалъ. Алексеевскэ реальнэ училищыр 1900-рэ илъэсым ащ къыщызэIуахыгъагъ. 1920-рэ илъэсым щыублагъэу еджапIэхэм яунэу хъужьыгъэ. Пшысэхэр зэхэзылъхьэщтыгъэ Евгений Шварц илъэси 8-рэ мыщ щеджагъ. Тарихъ хьалэмэт зыпылъ еджапIэм 2021-рэ илъэсым, Евгений Шварц къызыхъугъэр илъэси 125-рэ зэхъум, пшысэIуатэм ыкIи драматургым ыцIэ фаусыгъ. «Шварц и Унэ» иволонтерэу Ирина Константиновари зэхахьэм къыщыгущыIагъ.
Евгений Шварц Алексеевскэ реальнэ училищыр, джы Мыекъопэ гимназиер къызиухыгъэр мыгъэ илъэси 110-рэ хъугъэ. Ащ ыпкъ къикIэу «Шварц и Унэ» иволонтерхэр кIэщакIо фэхъухи, гимназиер къэзыухыхэрэм апае хэушъхьафыкIыгъэ вальс арагъэтхыным ипроект зэшIуахыгъ. Мэкъамэр зиер УФ-м изаслуженнэ артистэу, театрэу Эрмитажым ипащэу, композиторэу Андрей Семеновыр ары, къашъор зыгъэуцугъэр АР-м изаслуженнэ артисткэу Елена Сороковская. Симфоническэ шапхъэм изылъхьагъэр АР-м и Къэралыгъо филармоние исимфоническэ оркестр. АР-м культурэмкIэ и Министерствэ иIэпыIэгъукIэ проектыр гъэцэкIагъэ хъугъэ. Мыекъуапэ игурыт еджапIэхэм къачIэкIыхэрэм зэкIэми Евгений Шварц ыцIэ зыхьырэ гимназиер къэзыухыхэрэм явальсэу джы щыIэ хъугъэр агъэфедэзэ ашIын алъэкIыщтэу проектыр зигукъэкIыхэм алъытэ.
Вальсым иапэрэ лъэтегъэуцо-къашъор Мыекъопэ гимназиеу N 5-р мыгъэ къэзыухыгъэхэм еджэпIэ щагум къыщашIыгъ. Ащ ыуж гимназист бгъэхалъхьэхэр ыкIи Е. Шварцым исурэт зэрыт нэпэеплъ открыткэхэр ахэм аратыгъэх.
Апэрэ къэралыгъо ушэтын шъхьаIэхэр (ОГЭ) физикэмкIэ, биологиемкIэ, тарихъымкIэ непэ гимназием икIэлэеджакIохэм атыщтых. ЗэикI къэралыгъо ушэтынхэр (ЕГЭ) химиемкIэ, географиемкIэ, литературэмкIэ жъоныгъуакIэм и 26-м арагъэтыщтых.
Я 11-рэ «А» классым икIэлэеджакIоу Артем Стуканрэ а 1-рэ «А» классым ис Ляйсан Налбантовамрэ аужырэ одыджыныр къытырагъэоныр къафагъэшъошагъ. Ащ ымакъэ еджэпIэ щагум щыжъынчыгъ.
Тэу Замир.